[A:67a]pa dang / /rjes bzung grangs nges med pa dang / /sta gon 'grel pa med pa dang / /slob dpon grangs nges med pa dang / /dbang bskur yongs dag med pa dang / /lus dkyil 'byung khung med pa dang / /rgyas gdab rigs mtshon med pa dang / /bza' ba'i dam tshig med pa rnams/ /chos ltar bcos na chos min byed/ /smin par 'dod kyang 'dis mi smin/ /grol bar 'dod kyang grol mi nus/ /nor pa'i chos rnams dgag par bya/ /
ces sogs rgyas bshad dang bcas nas/ /smra po nyid kyis legs byas ltar/ /mtshan ma ngan pa mtshon pa'i tshig /du ma phreng du dngar bar byed/ blun po rnams kyis gang dran gyis/ /zab mo'i gnas la co 'dri ba/ /'di 'dra 'phel na bstan pa la/ /gnod phyir mkhas pa sun dbyung 'os/ /de phyir kho bos rnam dpyod kyis/ /rgyas par logs su bkag zin mod/ /slar yang de don rtogs sla'i phyir/ /nyung zhing gsal bar 'dir 'chad do/ /de la rgol ba dang po ni/ spyir dbu ma lugs kyi sems bskyed 'di lam 'bras brgyud pa la med/ khyad par du rje btsun chen pos mdzad pa'i sems bskyed kyi yi ge ngor chen pas sgo rum nas brnyed zer ba de'i steng nas sems bskyed byed pa ni brgyud pa chad pa ni tshig de nyid kyi shes shing / yi ge de'i steng nas sus kyang byas pa med zhes lam 'bras pa phyi ma rnams kyi brgyud pa grangs 'dren par byed do/ /zhes smra'o/ /de'i lan ni/
rje btsun mched kyi dbang chu dang / /mngon par rtogs pa ljon shing las/ /dbang bskur sngon du skyabs 'gro dang / /sems bskyed sdom pa 'bogs so zhes/ /gsungs pa de la lag len zhig /sa skya'i chos na yod dam med/ /yod na de yi brgyud pa gang / /med na khungs nas med pa 'am/ /gsar du chad pa gang yin brtag /dang po ltar na sku mched kyis/