[A:67b] /de ltar bshad pa ming tsam las/ /nyams len rim par ma byung phyir/ /byang chub sems mchog ma bskyed la/ /gsang sngags bstan na phung ngo zhes/ /rdo rje 'chang gis bkag pa de/ /rje btsun gong ma bsgrub mdzad dam/ /phyi ma ltar na dbang yod kyang / /sngon 'gro'i sems bskyed 'chad do zhes/ /chos dang mthun par smra nus sam/ /rang la khyab pa bsgrub byas nas/ /phyogs chos gzhan la sbyor ram ci/ /gang ltar byas kyang byang chub sems/ /ma bskyed pa la dbang bskur ba'i/ /nyes pa khyed kyi thog tu babs/ /byed na de yi brgyud pa ci/ /brgyud pa med pa'i sems bskyed cig /mi 'dod bzhin du khas len nam/ /thun mong min pa'i skyabs 'gro dang / /sems bskyed cho ga byed pa la/ /dbu ma'i lugs kyi sems bskyed pa/ /lam 'bras pa la med do zhes/ /rnam par dpyod la 'brel ci zhig /kun dang thun mong min pa'i chos/ /tshad ldan brgyud pa gnyis ldan la/ /sems bskyed brgyud pa med pa zhes/ /smod par byed pa'i smra ba'i lam/ /'dod lha'i bdag po'i phye bar zad/ /phyogs zhen dri la chags pa yis/ /gnas don pad tshal ma brnyed pa'i/ /'khos med sbrang bu'i gshog rgyang gis/ /nyi zla sgrib par 'dod pa mtshar/ /zhes bya ba ni bar skabs kyi tshigs su bcad pa ste don tshan dang po'o/ /
rgol ba gnyis pa la ni/ slob ma brgya phrag mang po la grangs nges med par rjes 'dzin gyi cho ga byed pa ni/ gsang ba spyi rgyud las/ mkhas pas slob ma gcig gam gsum/ zhes sogs kyi lung dang 'gal/ dbang gi chu bo las/ dkyil 'khor gcig tu slob ma nyi shu rtsa lnga las lhag pa bzung bar mi bya zhes sogs gong ma'i gzhung dang 'gal/ rjes bzung