[A:68b]gcig tu thog ma'i dbang bskur tshar gcig po de rigs mod/ de'i rjes su dkyil 'khor gcig nyid kyi steng nas nyin re bzhin sta gon snga ma'i dngos gzhi re dang dngos gzhi rting ma'i sta gon re spel nas zhu mkhan ma rdzogs kyi bar du byed do/ /'di shin tu mi rigs pa'i rgyu mtshan smin byed rdul tshon gyi dkyil 'khor gcig tu dbang bskur tshar gcig las lhag pa bskur du mi rung ste/ dkyil 'khor de la sta gon gcig las med pa'i phyir/ zhes sa skya pa'i srol 'dzin gzhan thams cad 'chad la/ khyed kyi de lta bu la gong ma'i lung yod na ston cig /gal te sta gon gsum po sngar byas pa des chog go zhe na/ 'o na sgrub mchod sogs kyang sngar byas pa de nyid kyi gnas pas nyi ma gzhan byed ci dgos/ gal te sta gon snga ma rnams bskyar nas byed dgos so zhe na/ dkyil 'khor bsgrubs zin nas de'i lha sta gon ji ltar byed ces smra'o/ /de'i lan ni/
sta gon gcig la dngos gzhi 'ga'/ /sbrel nas byed pa sa skya pa'i/ /chos na med phyir 'brel med ces/ /smra ba de la blun pa ste/ /de ltar yin na rje rtse mos/ /mdzad pa'i Dombhi dkyil chog las/ /sgrub mchod nyi ma lngar byas nas/ /sta gon gcig la dngos gzhi gnyis/ /mdzad pa'i dngos gzhi dang po la/ /rab gnas dang ni gnyis pa la/ /slob ma dbang bskur byed do zhes/ /gsal bar gsungs pa ma shes par/ /gong ma'i chos rnams 'gags par zad/ /rtse mo 'gag pa'i sa skya pa'i/ /rjes 'brang rnying pa gang nas byon/ /rje btsun chen po'i dus tha ma'i/ /sta gon gcig la dngos gzhi drug /byed par bshad pa'i phyi ma lnga/ /'brel med yin phyir mi rung bar/ /rjes 'brang za shal khyed 'dod dam/ /rje btsun 'gag pa'i sa skya pa/ /rnying pa de 'dra gad mo'i gnas/ /dkyil 'khor gcig tu dbang bskur ba/ /gcig las nam yang mi rung na/ /ras bris