[A:69a]bzhengs pa don re chung / /sta gon bskyar nas rung zhes na/ /dkyil 'khor bsgrub nas sta gon ni/ /ji ltar byed ces khyed nyid kyis/ /gzhan la smras pa de brjod dam/ /slob dpon lus kyi dkyil 'khor ni/ /gcig las med phyir lus dkyil du/ /dbang bskur slob dpon tshe gang la/ /gcig las byed du mi rung bar/ /gzhung bshad mkhas rlom khyed 'dod dam/ /de ltar na ni lam 'bras kyang / /tshar gcig nyid las mi rung bar/ /thal ba 'di la 'dod lan thob/ /mdor na 'di 'dra'i grub mtha' ni/ /mthong ba brgyud pa'i phyag len gyis/ /brgyan pa'i slob dpon ma bsten par/ /dkyil chog rnams kyi tshig rigs la/ /thug 'phrad byas pa'i gtam du snang / /mi mkhas rnams kyis rang nyid kyi/ /gtam ngan ngo sor byed pa mang / /rgyal ngan 'ga' zhig pha bsad nas/ /rgyal rnga brdung ba ji bzhin no/ /zhes bya ba 'di ni bar skabs kyi tshigs su bcad pa ste don tshan gsum pa'o/ /
rgol ba bzhi pa ni/ gzhan dag rdo rje slob dpon gyi dbang bskur byed pa'i tshe grangs dang nges bzung med par sta gon dus gyi nyer lnga po thams cad la dus cig car du dbang bskur ba ni sa skya pa'i lugs ma yin te/ slob dpon rin po che'i 'grel pa lugs kyi dbang chu dang man ngag lugs kyi dbang chu gnyis ka las nyer lnga po thams cad la slob dpon gyi dbang cig car du bskur ba bkag pa'i phyir te/ ji skad du/ slob dpon snying rje chen po yis/ /slob ma dam pa snying rje can/ /sngags dang rgyud rnams 'dzin pa po/ /gcig ni nan tan bskyed nas bzung / /zhes pa'i lung gi tshogs pa thams cad la dbang bskur bar mi bya ste/ slob ma'i gtso bor gyur pa dbang stegs la bzhag ste zhes dang / yang dbang bskur nas bkra shis brjod zin pa'i 'og tu thams cad bkug