[A:69b]nas de kho na nyid bstan par bya'o zhes gsungs pa'i phyir/ rje btsun gong mas bkag pa de nyid nan gyis bsgrub par ma byed cig ces rgol lo/ /de'i lan ni/
rdo rje slob dpon dbang bskur gyi/ /slob ma grangs nges bya dgos pa/ /gsang ba spyi rgyud la thug na/ /gsang ba spyi rgyud bya rgyud yin/ /bya rgyud rnams las slob dpon dang / /slob ma'i dbang gi zlas phye ba'i/ /rdo rje slob dpon dbang bskur gyi/ /don dang tha snyad gnyis ka med/ /khyad gzhi med pa'i khyad chos mtshar/ /rje btsun gong mas de drangs pa/ /rung mthun lung du drangs pa yin/ /dper na rtsa ltung bcu bzhi yi/ /lung sbyor mdo nas mdzad pa bzhin/ /rung mthun lung dang bshad pa'i khungs/ /nor ba shin tu bzhad gad che/ /spyi rgyud dgongs pa chos dbyings ltar/ /zab cing shin tu rtogs dka' ba/ /tshig tsam 'don pa lhur byed pa/ /khyed kyi re zhig rtogs mi nus/ /shes par 'dod na mkhas pa bsten/ /nges bzung can gyi bskur tshul de/ /byed na dbang gong dngos gzhi yang / /de lta'i tshul gyis bskur dgos par/ /skabs 'dir gong ma bzhed gyur na/ /khyed la tshul de yod min pas/ /ngal ba'i 'bras med glang chen khrus/ /gzhan du mchog dbang rnam pa gsum/ /slob ma'i dbang du khas longs shig /gzhan gzhung tshangs pa'i gzhal med khang / /byis blo'i gzong gis brkos pa las/ /rang lugs bye ma'i khang bu yi/ /tshul ngan dmangs nas zhig min nam/ /zhes bya ba 'di ni bar skabs kyi tshigs su bcad pa ste don tshan bzhi pa'o/ /rgol ba lnga pa ni/ gzhan dag rdo rje'i brtul zhugs dang rdo rje slob dpon gyi dbang rdzas la bskyed chog mi 'dod pa ni mi