[A:80b]yang dpa' bor 'gyur pa sogs brjod kyis mi lang bas/ 'di 'dra'i grub mtha' mi 'dzin par gsol ba 'debs so/ /smras pa/ byis pa sgron me thogs nas mun rum du/ lan brgyar 'bad kyang phyogs kun gsal mi nus/ /mkhas pa nyi zla'i 'od kyis skad cig la/ /rab yangs 'dzin ma'i khyon kun lham mer gsal/ /da lta sa steng 'di na sa skya pa'i/ /gsang chen bstan pa dri med 'dzin pa la/ /rje btsun ngor pa'i 'phrin las kho na las/ /gzhan du yod med gzur gnas kun gyis shes/ /de phyir tshul der smod na rang nyid ni/ /nyams par ma zad rje btsun sa skya pa'i/ /bstan la dad gus med par mi 'gyur ram/ /de bas da ni chags sdang phrag dog spongs/ /bdag ni byams pa rdo rje rgyal mtshan la/ /snying nas dad mos 'on kyang rjes 'brang 'ga'i/ /blo mtsho'i gting zab brtag phyir nyams dgar ni/ /smras la dam pas bzod bzhes thugs rjes skyong / /de skad brjod pa'i dge tshogs chu klung des/ /'gro 'di'i log rtog dri ma kun sbyangs te/ /'khrul med gong ma'i gsung gi nying khu yi/ /zung 'jug rdo rje'i bcud len grub gyur cig /mangga laM/ zhes pa de rnams kyis snyan brgyud mkhas pa'i dbang po'i gsung rab las 'byung tshul bstan zin nas/ bzhi pa de dag gi lan 'debs rdzong lugs kyi mkhas pa dam tshig legs bshad las 'byung tshul bshad pa la gnyis te/ chos rje bzang po bkra shis kyi gsung rab las 'byung tshul bshad pa dang / dge chu ba buddha shrI'i legs bshad las 'byung tshul bshad pa'o/ /dang po ni/ chos kyi rje mkhan chen bzang bkras pas mdzad