[A:102b]nyams su len pa'i lam de/ lam mtshan nyid pa'am/ rjes mthun pa gang yin zhes gong bzhin sbyar bas mtshungs so/ /gal te phyag rgya la brten pa mtshungs su chug mod/ tshogs 'khor gyi tshe sha chang la sogs pa dngos su longs spyod dgos na/ de ni rab tu byung ba sdom brtson gyi spang bya yin pas mi rung ngo snyam na/ 'o na dbang gi tshe mda' gzhu dang / ral gri la sogs pa dngos su dbang rdzas la dgos na/ de ni rab tu byung ba sdom brtson gyi spang bya yin pas mi rung ngo zhes brjod na lan yod pa ma yin te rnam pa kun tu mtshungs so/ /yang tshogs 'khor bya ba'i dus rang rgyud la ye shes rgyas pa'i thabs su lkog tu bya ba dang / gdul bya ma dad pa bzlog pa'i phyir dngos su bya ba gnyis las ma 'das zer ba ni ma brtags pa'i smra ba ste/ 'chi ba'i tshe 'am mu ge 'am/ /phas kyi 'khor lo'i gnod pa dang / /rab gnas dkyil 'khor sbyin sreg dang / /chags med pa dang zhi ba dang / /sngags dang bsgom par ldan pa yi/ /gang zag bdag ni rtag rol pa/ /de yi mdun na nga 'dug ste/ /de ni rdzun du mi 'gyur ro/ /zhes gsungs pa'ang ma mthong bar zad do/ /rab tu byung bas tshogs 'khor gyi tshe dam tshig gi rdzas ma brten pas ltung ba 'byung zhes brjod pa la/ klu sgrub nas chos rje pa'i bar rtsa ltung can du thal zer ro/ /rtsa ltung 'khrul spong las/ ltung ba'i ngo bo nyid rnam par gzhag pa ni/ tshogs kyi 'khor lo la sogs pa'i dus su bshes gnyen mos pa dam tshig gi rdzas dang 'phrad pa'i tshe skyug bro ba'am/ mi gtsang ba la sogs pa'i bsam pas spangs sam/ yang rab tu