[A:103a]byung ba la sogs pa bslab pas bcings nas chang mi 'thung ba dang / phyi dro'i kha zas bsten mi rung bas ltung ba byung du dogs pa'i bsam pas mi bsten pa'o/ /yang kha cig ni tshul 'chos pa'i bsam pas mi bsten pa'ang mthong ste/ 'di ni ches smad par bya ba'i gnas so/ /zhes gsungs na/ khyed kyi klu sgrub dang / chos rje pa sogs kyi sdom brtson thams cad rtsa ltung can du sgrubs shig yang na chos rje pas rje btsun gyi gsung de dag ma gzigs pa'am/ gzigs kyang zhal gyis mi bzhes pa'am bzhes kyang rnal 'byor dbang phyug gi gdam ngag ma yin par khas longs shig yang rigs sngags mkhan po na re/ tshogs kyi 'khor lo rnal 'byor pas bya dgos pa'i lung / rab tu byung bas bya mi rung ba'i lung / tshogs rdzas kyi sha chang rgyud sde las bshad pa dgos pa'i lung / dang po ni tshogs kyi 'khor lo byed pa la rnal 'byor pa nus pa can dgos par gang las shes she na/ dpal dus kyi 'khor lo'i 'grel par/ 'dir byis pa rnams kyis brjod par bya ba gang yin pa de/ de bzhin gshegs pas rgyud kyi rgyal po thams cad las/ bdud rtsi lnga la sogs pa rnams bza' bar gsungs pa de ni bden te/ 'on kyang rnal 'byor pa rnams kyi yin gyi/ tha mal pa'i sems can rnams kyi ni ma yin no/ /gang dag gi sngags kyi stobs sam/ bsam gtan gyi stobs kyis sbyangs pa byas pa dang / rtogs pa byas pa dang / rab tu sbar bar byas pa dang / dag pa rnams ni dug med par 'gyur ba dang / chang rnams ni 'o mar 'gyur ba dang / zhes