[A:108a]byung ba'i cha lugs bzung nas ci zhig bgyid legs par soms shig yang lugs de nyid du/ snod kyi skyon yon ma brtags par theg pa ches dman pa'i rigs can la dbang bzhi bskur te zab mo'i gnas rnams bstan pa las/ zhes pa 'di yang rdo rje theg par ma zad dam pa'i chos ston pa thams cad la snod kyi skyon yon brtag dgos pa shin tu yin kyang / khyed kyi lugs ltar na gangs khrod kyi skye bo thams cad rdo rje theg pa'i snod ldan du gzigs par sems te/ gsang sngags kyi thun mong ma yin pa'i phyag len dang / sngags dang phyag rgya dang / gar la sogs pa snod min la gsang dgos pa rnams skye bo thams cad 'dus pa'i sar 'jig rten pa'i glu gar dang khyad med kyi tshul du mdzad par snang bas so/ /yang de nyid du de ni 'dod yon bsten pa lam du byed pa rdo rje theg pa las 'dod yon spong ba lam du byed pa theg pa gzhan khyad par du 'phags par yang don gyis 'dod pas zhes bris pa yang smyon gtam yin te/ gang zag gi rigs ma phye ba spyi btang tsam nas de ltar 'dod pa po su yang med pa'i phyir/ gang zag gi rigs la ltos na rdo rje theg pa nyid khyad par 'phags pa'i nges pa med de/ theg pa dman pa'i rigs can rnams la theg dman gyi chos kho na zab pa sogs rang rang gi skal ba dang 'tshams pa'i chos de khyad par du 'phags pa'i phyir/ nad dang sman gyi dpe dang mtshungs pa'i phyir te/ klu sgrub kyis/ ji ltar nad pa na ba la/ /sman pas sman ni gtong ba ltar/ /de bzhin sangs rgyas sems can la/ /ji tsam bzod pa'i chos bstan to/ /zhes