[A:115a]pa med pa'i phyir/ der thal/ 'dul ba ji lta ba bzhin du spyod pa'i phyir/ 'dis mtshon nas rigs pa'i gnod pa grangs med pa 'gro ste/ rigs pa shes pa rnams kyis spros te dgag par bya'o zhes bya ba bris so/ /gnyis pa de'i lan bshad pa ni/ 'o na khyed rang gi lugs la dge slong rdo rje 'dzin pas sngags kyi nyams len byed pa na/ gang 'dul ba dang mi mthun pa de'i tshe/ sngags gtso che ba zhig gam 'dul ba gtso che ba zhig dang po ltar na dge slong rdo rje 'dzin pas sngags kyi nyams len byed pa'i tshe/ 'dul ba nas bshad pa'i bslab bya la bsrung sdom byed mi dgos par thal/ de'i tshe sngags gtso che ba'i phyir/ khyab pa khas/ 'dod na/ dge slong rdo rje 'dzin pas dus rgyun du 'dul ba'i bslab bya la bsrung sdom byed mi dgos par thal/ 'dod pa gang zhig des dus rgyun du sngags kyi nyams len byed dgos pa'i phyir/ gzhan yang rgyud las/ phyi ru nyan thos spyod pa bsrung / /zhes pa dang / nyan thos spyod pa srung ba po/ /zhes pa rnams kyang / sngags kyi nyams len byed pa po ma yin par 'gyur zhing / yang na de nyan thos kyi spyod pa srung ba po min par 'gyur ro/ /gzhan yang nyan thos 'dul ba pa rnams kyi gsang ste spyod dgos pa med par thal/ des 'dul ba ji lta ba bzhin spyod pa'i phyir/ khyab pa khas/ 'dod mi nus te/ des gsang ste bar chad dri ba sogs gsang ste spyod dgos pa yod pa'i phyir/ des na khyab pa 'di 'dra'i rigs pa grangs med byas kyang mkhas pa rnams bzhad mo grangs med 'chor ba'i rgyur zad do/ /rigs