[A:115b]pa shes pa rnams kyis spros te dgag par bya'o/ /zhes pa ni rigs pa shes pa 'di 'dra ba'i khyab pa mi 'cha' las che'o legs par dgongs 'tshal lo/ /yang de nyid du/ gzhan smras pa de dag ni phal cher skyon dang bcas pa ste/ rab byung gi tshogs 'khor bshad pa'i rjes su rnal 'byor pa rnams kyis kyang zhes pa de ltar na/ rnal 'byor pa yin na khyim pa yin dgos pa dang / rab byung yin na rnal 'byor pa ma yin dgos pa'ang tha chad pa yin no/ /zhes bya ba bris so/ /'di yang mi 'thad de/ rab tu byung ba dang / rnal 'byor pa'i tshogs 'khor so sor bshad pa tsam gyi/ rab byung yin na rnal 'byor pa min pas khyab par mi 'gyur ba'i phyir/ gal te 'gyur na rje btsun sa paN gyis kyang tshogs 'khor lugs gnyis so sor bshad pa la ci ltar bya legs par soms shig de la kho na re/ sa paN gyis de ltar bshad pa dang / khyed kyis de ltar bshad pa mi mtshungs te/ khyod kyis rab byung mchog dang / rnal 'byor pa khyim pa'i dman par bzung bas nongs la/ sa paN gyis ni so thar la bstun pa che chung gi sgo nas bzhag ste don la khyod dang dman mchog go log pas skyon med do/ /zhes sa paN gyi gsung dang 'gal ba'i rtsod spong gi skabs su bris so/ /'di yang mi 'thad de/ nged kyis rnal 'byor pa yin na rab byung las dman pas khyab pa dang / khyim pa yin pas khyab par khas ma blangs pa'i phyir ro/ /gzhan yang dman mchog go log ces pa yang / rab byung yin na rnal 'byor pa las dman pas khyab par smra ba yang bzhad mo'i rgyu yin te/ shAkya thub pa rab byung min par