[A:116b]pa mang bas/ lugs phan tshun mi bsre bar chos skad rang rkang tshugs pa 'dod dgos zhes smras na ci zhig smrar yod/ ces sogs bris so/ /'di yang mi 'thad de/ dus kyi 'khor lo'i rang rkang gi nyams len byed pa'i gang zag des bla med spyi nas bshad pa'i rtsa ltung bcu gsum pa bsrung mi dgos par thal/ bla med spyi la tshogs kyi 'khor lo'i dus sha chang ma bsten na rtsa ltung bcu gsum pa 'byung ba gang zhig de sha chang sogs la ma bsten pa'i dus kyi 'khor lo las gsungs pa'i tshogs kyi 'khor lo byas pas tshogs 'khor mtshan nyid par 'gyur ba'i phyir/ rtags gnyis char khas/ 'dod na/ bde kyai gsang gsum sogs bla med kyi dkyil 'khor re re la bsrung bya rtsa ltung mi 'dra ba re re yod par thal/ 'dod pa'i phyir/ 'dod na/ dus kyi 'khor lo'i dkyil 'khor du thob pa'i sngags sdom la rtsa ltung gis ma gos pa'i gang zag dang / kyai rdo rje'i dkyil 'khor du thob pa'i sngags sdom la rtsa ltung gis gos pa'i gang zag gi gzhi mthun yod par thal/ 'dod pa'i phyir/ 'dod na/ rtsa ltung gis nyams pa'i gang zag dang / rtsa ltung gis ma gos pa'i sngags sdom rgyud ldan gyi gang zag gzhi mthun yod par thal lo/ /gzhan yang dus 'khor dang kyai rdo rje gnyis char gyi dkyil 'khor du dbang thob pa'i rdo rje 'dzin pa des tshogs kyi 'khor lo byar mi rung bar thal/ des sha chang la bsten pa'i kyai rdor sogs kyi lugs kyi tshogs 'khor byas na dus kyi 'khor lo dang 'gal bas de'i dkyil 'khor du thob pa'i sngags sdom la nyes pas gos par 'gyur zhing / des sha chang sogs la ma