[A:121b]lo/ /des na thub pa'i dbang pos nyid kyi gsung las/ dge slong dag gam mkhas rnams kyis/ /bsreg bcad brdar ba'i gser bzhin du/ /legs par brtags la nga yi bka'/ /blang bar bya yi gus phyir min/ /zhes gsungs pa ltar/ skal bzang rnam par dpyod pa'i blo gros dang ldan pa rnams kyis phyogs zhen dang pho rus sogs kyi grub mtha' 'dzin pa spangs te rang gzhan gyi lta ba dang grub mtha' la lung dang rigs pas brtags shing dpyad nas blang dor tshul bzhin byas pa'i sgo nas rang gzhan thams cad la 'phral yun gyi phan bde rgya chen po 'byung ba'i thabs la brtson par bya'o/ /sngon byon gong ma mkhas grub rnams kyi dgongs bzhed rnams/ /don la mi 'gal gcig tu gnas mod kyang / /tha snyad tsam gyi snang ngor mi mthun pa'i/ /tshul gyis grub mtha'i dgag sgrub mdzad pa la/ /bdag 'dras yin min shan 'byed mi rigs kyang / /rnam par dpyod pa'i blo yi me long nang / /gnas lugs gzugs brnyan 'char ba chos nyid yin/ /nyes pa mchis gang 'dren pa'i spyan sngar bshags/ /bdag gi bla ma rigs brgya'i mgon po des/ /mdzad pa ji bzhin theg pa gong 'og gi /nyams len blang don tshul bzhin bsgrub byas na/ /nam yang bslu bar mi 'gyur skal ldan rnams/ /gzhan 'ga' mdo rgyud gzhung don mi shes shing / /rim gnyis rtogs pa zab mos dben bzhin du/ /dkyil chog shar byang rol mo mkhas tsam la/ /rdo rje 'dzin par rloms rnams e ma mtshar/ /des na rdo rje theg pa'i nyams len la/ /brten nas thar lam bsgrub 'dod skal ldan rnams/