[A:124a]pa/ zhes gsungs pa'ang gzhung 'di'i don yin pas tshad mar mdzad par grub pa'i phyir dang / ding sang yan chad kyi dpal ldan sa skya pa rjes 'brang dang bcas pa'i kyai rdo rje man ngag lugs kyi ras bris bzhengs sku sogs mthong ba kun la 'dir bshad pa'i bzhugs tshul kho na ltar snang bas de dag kun kyang yi ge 'di tshad mar byed pa 'grub pa'i phyir dang / khyad par khyed rang gi rtsa ba'i bla ma shar pa ye shes rgyal mtshan gyis mdzad pa'i gur rigs bsdus kyi sgrub thabs su bzhugs tshul 'di kho na ltar bshad pa'i phyir dang / grub chen buddha shrIs thugs dam ras bris la yang bzhugs tshul 'di bzhin du yod par grags pas bla ma de dag kyang yi ge 'di tshad mar byed pa gsal ba'i phyir dang / gang zag de tsam gyi tshad mar byas pas tshad mar mi 'gyur na/ ha cang thal ba las kyang ches thal ba yin pa'i phyir ro/ /yang 'di la rjes 'brang kha cig na re/ slob dpon rin po ches mtsho skyes 'grel par/ de dag kyang mnyam par brtsegs pa'i snying khar zhabs g.yas gnyis kyis mnan pa'o/ /rol mo'i tshul ni skyil krung phyed pa'o zhes dang / mtsho skyes dbang chog tu/ bdud bzhi brtsegs pa'i gdan la zhabs g.yas gnyis brkyangs g.yon gnyis bskum pa'i gar stabs kyis bzhugs pa zhes gsungs pa'i bzhugs tshul 'di dang mi mthun pa'i phyir rnam par ma go zhes smra ba grag go /de ni lugs so sor ma phyed pa'i babs bcol yin te/ lugs de dag mtsho skyes kyi dgongs 'grel yin pa'i phyir dang / gnyis ka'i thun mong ba yang yod mod kyi/ bzhugs tshul mi