[A:133a]cung zad yod pa la 'gal ba ci yang med do snyam du kho bo cag sems te/ snying po don gsal las/ de slad khyod zhabs phyag dang phyag mtshan gzhan dbang kho nar bdag gis 'tshal/ /zhes bshad pa'i phyir ro/ /'on kyang lugs gcig la brten pa'i rang rang gi bla ma brgyud pa tshad ldan gyi lung dang 'gal na/ de dang de'i skabs su dgag par nus pa yin gyi/ dgongs pa so so'i bzhed tshul gcig gis gcig la gnod par nus pa ni gtan ma yin te/ mkhas pa 'jug pa'i sgor/ gzhal bya gsum pa spyod pa na/ /rang rang lung dang 'gal na gnod/ /dper na chags sogs sdig pa dang / /chags bral chos su 'chad bzhin du/ /khrus kyi sdig pa 'dag pa dang / /'tshe ba chos su smra ba bzhin/ /zhes gsungs pa lta bu'o/ /yang ras bris la sogs pa'i sku gzugs rnying pa rnams la brtsegs gdan du byas pa 'di lta bu ma mthong ngo zhes zer ba yang / rang nyid kyis ma mthong ba la zer na ni shin tu mad pa yin kyang / spyir ma mthong ba ni khegs par nus pa ma yin te/ jo bo nA ro ta pa'i thugs dam rgya gar gyi ri mo ngo bo gur rigs bsdus pa'i dkyil 'khor paN chen shAkya shrI'i bod du bsnams byon te thar pa lo tsA ba'i dgon par bzhugs 'dug pa bdag gis mngon sum du mthong ba la yang brtsegs gdan gyi bzhugs tshul 'di pa bzhed pa ltar yod pa dang / 'phags pa'i yul gyi he badzra'i rdo sku rnying pa la yang / dus phyis rgya gar du phyin pa'i mis dngos su mthong ste ngor pa'i lugs kyi kyai rdo rje'i zhabs kyi bzhugs tshul 'di rgya gar na yang 'dug go