[A:133b]zhes rjes su sgrog pa'i phyir dang / rje btsun ga ya dha ra'i rgya dpe'i thog mar yang 'di lta bu bris yod par sa lo tsA ba gnyis pa dag gis gzigs par grags pa'i yang phyir ro/ /des na gong du bshad pa'i dgag yul gtan med pa'i dgag pa de dag dang / de dang rjes su 'brel ba'i skyon brjod spyi btol gyi tshig dang bcas te smras 'dug pa rnams kyang legs par ma rtogs par yin pa bshad cing / dpal ldan sa skya paNDi tas/ rang nyid mun khung zhugs nas ni/ /nyi ma'i 'od la 'khang ba ltar/ /de bzhin sdig pa'i lugs zhugs nas/ /phan mdzad khyod la 'khang bar zad/ /ces gsungs pa yang 'di 'dra ba la dgongs pa yin par go bar byos shig yang gzhal yas khang gi gsal byed ces bya ba'i yi ge bsdus pa gcig yod 'di 'ba' zhig tu rje btsun rtse mos mdzad bya ba dang / la la rje btsun gyis mdzad zer ba yong gin 'dug kyang / rje btsun sku mched kyis mdzad par nges pa dang / mdzad pa ma yin par nges pa'i shes byed khungs thub pa ci yang ma mthong zhing / khyed kyi chos rje dpal ldan bla ma dam pa rje btsun yab sras gsum gyi bka' 'bum sgrigs pa'i srol thog mar phye ba de'i nang du ma chud kyang theg chen chos rje'i phyag dpe la 'di nyid kyi mjug tu/ 'di la phyi mo du ma snang na yang / bka' 'bum snga ma rnams su ma bcug phyis sgo rum dpe khang nas kyang bla dpe rnying pa byung ba mthong bas yid ches par byas nas bka' 'bum phyi ma rnams su bzhugs su gsol ba yin no zhes gsungs pas tshad ma yin par nges pa'i phyir yi ger bris so/ /'di yang sgrub byed tshad ldan ma yin