[A:136a]bral du thag bcad/ de la dbu ma dang mthun par dpe brgyad dam bcu gnyis kyi dkri/ zhes 'di yan gyi pha rol du phyin pa'i lam gyi dkri tshul thams cad thabs shes rab kyi dkri tshul rdzogs par bstan nas/ theg pa chen po thun mong ma yin pa ltar rnal 'byor chen po la gang zag rigs gsum so so'i 'jug pas dkri na/ thabs kyi phyogs dang / shes rab kyi phyogs dang / byang chub kyi zung 'jug gi rnal 'byor pa gsum mo/ /dang po la rigs gsum/ tha ma tshogs tsam bsog pa/ 'bring las tshogs bsgrub pa/ rab bskyed rim bsgom pa'o/ /gnyis pa shes rab kyi phyogs la gsum/ tha ma lta ba tsam la blo gnas pa/ 'bring bskyed rim la sems 'dzin par 'dod pa/ rab rlung gi rnal 'byor bsgom pa'o/ /gsum pa zung 'jug gi rnal 'byor la gsum/ dang po bzlas brjod sbyin sreg gis rgyud sbyangs/ 'bring de kho na nyid la blo bzhag rab man ngag gi gnad bcu gcig gi lam khrid/ de la tha ma bzlas brjod sbyin sreg gis rgyud sbyang ba ni bsnyen pa ji tsam song ba'i bcu cha'i sbyin sreg byed/ 'bring de kho na nyid la blo bzhag pa ni/ rgyu dus kyi lta ba'i dpe sum cu so bdun gyi khrid byed/ rab man ngag gi gnad bcu gcig ni/ sbyang ba khyad par can nas brtsams te sems kyi rba rlabs phan chad 'jig rten pa'i lam la gnad dgu/ 'das pa'i lam la gnad bcu gcig gi dkri ba'o/ /gang zag dbang po rab 'bring gsum du dkri ba'i gzhung shing 'di slob ma rnams kyi gsol ba btab pa'i ngor rnal 'byor pa grags pa rgyal mtshan gyis sbyar ba'o/