[A:136b]/zhes bris pa 'di mnga' ris gung thang gi sgo mang chen po'i phyag dpe rnying pa zhig la bris pa yang mthong zhing / 'di la theg pa thun mong ba'i dkri lugs la gnyis su byas pa'i nyan thos dang thun mong ba la yang gang zag gsum gyi rim pas 'khor ba'i nyes dmigs tsam bstan te 'khor ba thams cad sdug bsngal gyi rang bzhin du shes nas de spong 'dod kyi blo tsam bskyed pa dang / 'khor ba spong ba la chos bsgrub pa'i rten dal 'byor brnyed par dka' bar shes nas brten te/ de la chos byed 'dod kyi blo bcos ma ma yin par bskyed pa dang / 'chi ba mi rtag pa bsgom pas myur du brtson 'grus bskyed de 'dus byas mi rtag pa'i gnas tshul bsgom pa ste/ 'di gsum yang gang zag tha ma'i khrid tshul dang po'o/ /gnyis pas gnyis pa/ gsum pas gsum pa ste/ gsum po re re yang khrid tshul re re yin la/ de yang dang po gnyis ni thabs kyi phyogs kyi nyams len yin la/ gsum pa ni nyan thos lugs kyi shes rab kyi phyogs te bsgom pa de mthar phyin pas 'dus byas mi rtag pa dang / mya ngan las 'das pa zhi bar rtogs pa'i phyir ro/ ji skad du/ kye ma 'dus byas rnams mi rtag /skye zhing 'jigs pa'i chos can yin/ /skyes nas 'jig par 'gyur pas te/ /de bas nye bar zhi ba bde/ /zhes bshad pa ltar ro/ /'di lam 'bras dang 'brel pa can du bsgom pas yas bcal na zung 'jug gi rnal 'byor pa'o/ /yang theg pa chen po thun mong ba la byams pa tsam bsgom pas gzhan bde ba tsam 'dod pa'i blo skye/ snying rje bsgom pas sdug bsngal dang bral ba/ byang sems bsgom pa la