[A:137a]
kun rdzob byang sems kyi sdug bsngal thams cad spong zhing bde ba dang ldan pa'i gnas sangs rgyas kyi go 'phang thob 'dod kyi blo bcos min skye zhing / 'di la yang gang zag gsum gyi khrid tshul gsum ste/ gsum ka yang thabs kyi phyogs kyi khrid tshul gtso che'o/ /gnyis pa 'khor 'das dbyer med la bslab pa la yang / chos thams cad sems su bsgrub pas rnal 'byor spyod pa'i dbu ma tsam/ de sgyu mar bsgrub pas sgyu ma lta bu'i dbu ma pa/ de spros bral du thag bcad pas rab tu mi gnas pa'i dbu ma pa'i lta ba'i khrid tshul ste/ de la dbu ma dang mthun par dpe brgyad dam bcu gnyis kyis dkri ste gsum po re re yang lta ba'i khrid tshul re re yin no/ /'di yan theg pa thun mong ba'i khrid tshul gnyis su byas pa'i gnyis po re re la yang lam yongs rdzogs kyi khrid tshul re re tshang bar yod do/ /'dir 'khor 'das dbyer med kyi khrid tshul ni dbang gi ye shes dang sbyar nas ston pa ma yin gyi/ dbu ma dang mthun par thos bsam gyi sgro 'dogs dpyod pa'i lta ba'i dkri tshul lo/ /gsum pa thun mong ma yin pa rnal 'byor chen po la gang zag rigs gsum so so'i 'jug pa dkri na/ thabs kyi phyogs dang / shes rab kyi phyogs dang / zung 'jug gi rnal 'byor pa gsum mo/ /dang po la yang tha ma tshogs tsam bsog pa/ 'bring las tshogs bsgrub pa/ rab bskyed rim bsgom pa'o/ /gnyis pa shes rab kyi phyogs la gsum/ tha ma lta ba tsam la blo gnas pa/ 'bring bskyed rim la sems 'dzin par 'dod pa/ rab rlung gi rnal 'byor bsgom pa'o/ /gsum pa