[A:137b]zung 'jug gi rnal 'byor pa la gsum/ dang po bzlas brjod dang sbyin sreg gi rgyud sbyangs/ 'bring de kho na nyid la blo bzhag rab man ngag gi gnad bcu gcig gi lam khrid/ de la tha ma bzlas brjod sbyin sreg gi rgyud sbyang ba ni bsnyen pa ji tsam song ba'i bcu cha'i sbyin sreg byed/ 'bring de kho na nyid la blo bzhag pa ni/ rgyu dus kyi lta ba'i dpe sum cu so bdun gyi khrid byed/ rab man ngag gi gnad bcu gcig ni/ sbyang ba khyad par can nas brtsams te sems kyi rba rlabs yan chad 'jig rten pa'i lam la gnad dgu/ 'das pa'i lam la gnad bcu gcig gi dkri'o zhes gsungs pas/ thun mong ma yin pa'i rnal 'byor chen po'i lam gyi dkri tshul la/ gang zag gsum gyi dkri tshul dang po gnyis la gsum gsum ste drug dang / gsum pa zung 'jug gi rnal 'byor pa la khrid tshul gsum yod pa'i/ dang po ni/ gzhung ji lta ba bzhin dkri ba'i khrid yig las/ de yang bskyed pa'i rim pa la brten nas bsnyen pa bzhi 'bum la sogs pa ci 'grub bzla zhes pa nas/ snang ba dkyil 'khor du gsal bar 'dod na gsal bar gyur ba'i bar du bskyangs so zhes pa'i bar de khrid tshul gcig go /yang 'bring de kho na nyid la blo bzhag pa'i khrid tshul ni/ kha cig snang ba gsum gyi khrid bor te lta ba nas skyong ba yang yod do/ /zhes pa nas lta ba rang byung gi ye shes skye bar 'gyur bas rgyu la nan tan du bya'o/ /zhes pa'i bar gyi zung 'jug gi rnal 'byor pa'i khrid tshul gnyis pa'o/ /gsum pa ni/ yang gang zag gi rigs kha cig sngar bstan pa'i khrid thams cad lo gcig tsam gyi sbyangs nas/ zhes