[A:141a]lugs de la ni/ don gyi thog nas dgag pa legs par song ba yin/ slob dpon cha pa chen po de ltar bzhed pa'i nges pa med dam snyam pa/ gcig dang po rgyal sras 'jug ngogs mthong ba'i dus su byung ba yin te/ da lta dpe ma brnyed pas gsal bar zhu rgyu ma mchis/ spyir ngo bo dang rang bzhin la sogs pa chos de dang de'i rang ldog tsam la bshad pa shin tu mang po zhig 'byung bas/ dngos po dang yod pa'i sgra 'jug tshul ltar skabs thob kyis gang la gang 'jug shes pa gal che ste/ dper na/ gang phyir dngos kun rang bzhin gyi/ /rang rang ngo bo la gnas phyir/ /mthun dngos gzhan gyi dngos dag las/ /ldog pa la ni rten pa can/ /zhes dang / dngos po kun la khyab pa po/ /zhes pa'i dngos po dang / rang bzhin rnams shes bya mtha' dag la bshad dgos pa bzhin no/ /bden gnyis kyi gnas lugs 'di dag rgyal sras lam bzang dang / rin po che'i ljon shing la da dung zhib tu gzigs nas kun chub par zhig mdzad pa shin tu gal che lags/ dri ba gnyis pa ngo bo nyid la ngo bo nyid kyi rgya la sogs pa rigs 'chol ma yin par gzhung don rab gsal sogs las gsal bar gsungs gda' lags pas/ de ltar na 'di la 'di'i rgyas btab na rigs 'chol du 'gyur zhes pa'i gsal kha cig ces gsungs ba'i lan ni/ ngo bo nyid la ngo bo nyid kyi rgya la sogs pa ni rgyas btab ma 'chol ba yin la/ de dag las bzlog nas ngo bo nyid la ngo bo nyid kyi rgyas 'debs pa'i skabs su/ rgyu la 'bras bu'i rgyas 'debs lta bu byas pa