[A:144a]lo/ /mdor na rgyu rgyud kyi gnas skabs sbyang gzhir 'gyur ba mang du yod pas rgyu rgyud sbyang gzhi zhes dang / rgyu rgyud kyi gnas skabs la ma dag pa'i snang ba sna tshogs pa yod pas ma dag pa'i snang ba la rgyu rgyud du bshad pa sogs mang du yod pa rnams kyi sgra ji bzhin pa la zhen pa dang / phung po lnga'i chos nyid sbyang gzhir bshad pa yang / chos nyid rang ngos nas sbyang gzhir mi 'gyur yang blo snang gi chos nyid de tsam la bsam nas/ phung po lnga'i chos nyid mi dmigs te zhes sogs kyi tshig sbyor gsungs pa yin la/ chos nyid bden grub du 'dod pa rnams la ni phung po lnga'i chos nyid mi dmigs te zhes zer du mi rung bas/ tshig gi sbyor tshur snga ma de nor pa yin par khas len dgos so/ /rgyas par mkhas mchog smra ba'i seng ge'i gsang ba 'dus pa 'jam pa'i rdo rje'i rnam bshad la zhib tu gzigs shing dpyod par zhu/ dri ba drug pa ljon shing las rdo rje slob dpon la las dang po pa dang / brtan pa thob pa dang / brtan pa cher thob pa rnams/ drod ma skyes pa dang / drod chung 'bring thob pa dang / drod chen po thob pa dang / rim bzhin du sbyar ba lta bu zhig gsungs 'dug pa dang / 'khrul spong du rgyud rgya gzhung nas gsungs pa'i rdo rje slob dpon gyi mtshan nyid gsungs pa rnams las dang po pa'i dbang du byas pa yin gsungs gda' lags pa/ mdor na gang zag gsum po de'i ngos 'dzin gsal ba gcig ces gsungs pa'i lan ni/ ljon shing las/ dbang bskur thob cing dam tshig dang sdom par ldan pa'i gang zag spyi ldog nas/ las dang po pa