[A:145a]pa'i stobs kyis mnyam gzhag tu yang / de kho na nyid kyi nyams myong mtshan nyid pa ma skyes pa'i bar las dang po pa/ de nas mnyam gzhag tu de lta bu'i nyams nges par skyes shing / rjes thob du yang snang ba khra bor 'char ba'i bar brtan pa thob pa/ chu bo rgyun gyi rnal 'byor skyes nas brtan pa chen po thob par rje btsun sa skya pa gong ma rnams bzhed par mngon lags/ dri ba bdun pa/ gnas gsum gsal byed las/ yul chen sum cu so bdun tshang bar 'byor ba'i dbang pos mdzad pa'i dga' ba'i me tog ces bya ba'i bstan bcos las gsungs pa sogs gsungs gda' lags pa/ 'di dri med rgyan 'grel dang mi mthun tsa na/ yul chen sum cu so bdun dang / zhes sogs kyi gzhung gi dgongs par ji ltar 'gro lags/ gling bzhi dang gling bzhi gcig tu sdom pa dang lnga/ phyi'i yul yin na gsung rab dgongs gsal las yin par gsungs gda' lags pa dang / sbas pa'i rtsa lnga'i ngos 'dzin gsal ba gcig kyang zhu zhes pa'i lan la/ sdom gsum gyi dri ba'i nang du/ phyi rol yul chen so bdun zhes/ /bya ba rgyud gzhung gang nas bshad/ /ces dris pa'i lan la/ phyi rol du yul chen sum cu so bdun re re nas dkyus gcig la bgrang pa gcig gis khungs ston dgos byung ba la/ 'byor pa'i dbang po dang / bde mchog stod 'grel dang / 'grel pa gru gzings sogs las gsal bar bshad pa'i khungs drangs nas gnas gsum gsal byed du bshad pa yin la/ stod 'grel gyi nang du yul sum cu rtsa gnyis phyi nang du sbyor tshul dang / yul sum