[A:145b]
cu rtsa bdun byang phyogs so bdun dang sbyor ba'i tshul tsam smos nas/ phyi'i yul chen sum cu so bdun re re nas 'di ltar yin bgrang pa med cing / phyi rol du re re nas 'dren dgos pa'i tshe na/ indra bhu ti dang / rdo rje gsang ba dang / bde mchog stod 'grel dang / gru zings sogs las gsungs pa gang rung las/ mi 'da' zhes bsam pa yin pas 'gal ba med par sems lags/ gling bzhi dang gling bzhi gcig tu sdom pa dang lnga/ phyi rol gyi yul chen du spos khang pa'i sdom gsum gyi TIkka dang / gsung rab dgongs gsal gnyis las/ de lnga phyi rol yul chen du gsungs 'dug kyang / de rnams nged khas mi len pa rgyu mtshan dang bcas nas gnas gsum gsal byed rang du zhib par bshad yod lags/ sbas pa'i rtsa lnga ni/ snying kha'i dbus su ro rkyang gnyis las mdun rgyab dang / g.yas g.yon du gyes pa'i rtsa bzhi dang / sambu Ti las/ dbu ma'i g.yon phyogs su chu shing gi snye ma lta bu zhes dbu ma nyid las gyes pa'i rtsa gcig yod par bshad pas de dang lnga po la ngos 'dzin zhes rdo rje 'chang kun dga' bzang po'i gsung bgros 'dzin pa'i bla ma bgres po rnams gsung gin mchis/ rtsa lnga po de'i rtse mo'i cha la yi ge lnga yod pa ni snying kha'i nang bskor gyi rtsa yin yang yi ge'i ldog pa nas sbas pa'i rtsa lngar tha snyad mi 'dogs zhes pa 'di tsam gcig phul/ 'di la brjod par bya ba mang du yod kyang 'di rnams nang gi zab don yin pas yi ger mang du ma bris shing mtha' dpyod byed pa la bla ma gong ma rnams mi dgyes 'dug lags/ dri ba brgyad pa/ nyi ma nub pa dang zhes pa la