[A:14b]dag dang shin tu 'grig cing / rje sa paN gyis mdzad par grags pa'i dkar chag cig shos de ni lung phu ba kun rgyal gyis mdzad pa yin zhes gsung bgros rnams las 'byung la/ rgyud yig 'ga' zhig las/ shong ston khu dbon gyi slob ma lo tsA ba kun dga' rgyal mtshan zhes pa zhig 'byung gin snang ba de dang gcig pa 'dra zhing / dkar chag de las/ snang ba gsum lam gyi gzhi bca' la sbyar ba'i tshe de'i sngon du dbang bskur 'gro dgos pa'i gsal kha ci yang mi snang mod/ spyir dkar chag 'di la tshig rigs dang mdzad byang sogs 'dra mi 'dra sna tshogs zhig 'dug pas/ bsreg bcad brdar ba'i gser bzhin du legs par brtags nas blang dgos par mchis lags/ gnyis pa ni/ de ltar bshad ma thag pa'i khrid tshul de rnams kyi go rim gyi nges pa de ltar 'byung ba'ang rje btsun gong ma nyid kyi bzhed pa yin te/ rje sa chen gyi dbang bzhi ngo spros las/ mtshan nyid ldan pa'i bla ma la/ /snod dang ldan pa'i slob ma yis/ /dbang bzhi rdzogs par thob nas ni/ /rgyu dus lta bas rab brgyan pa'i/ /bum dbang bskyed rim thog mar bsgom/ /zhes dang / de'i rang 'grel las/ thog mar bla ma gcig la dbang bzhi rdzogs par thob pa gal che/ dbang de yang brda tsam byin rlabs tsam ma yin par/ grub pa'i bla ma brgyud pa'i bka' ma chad pa/ lhad ma zhugs pa cig la dkyil 'khor chen por dbang bskur ba thob dgos/ de nas thog mar lta ba bsgom la/ de'i ye shes cung zad skyes pa na/ zhes sogs dbang rjes de ma thag par lta ba 'khor 'das dbyer med ston par