[A:15a]gsungs pa dang / a seng ma las/ snang ba gsum gyis lam gyi gzhi bcas te/ nyams blangs ma lus rgyud gsum dag gis shes/ /zhes gsungs la/ de dang mthun par rje btsun gyi gzhung ji lta ba bzhin du dkri ba'i khrid yig jo lcags kyi don du mdzad pa las/ snang ba gsum gyi dkri ba'i skabs bstan zin to/ /de'i rjes kho na la rgyud gsum gyis dkri bar bya ste/ de la gsum/ rgyu chos can 'khor ba'i gnas tshul/ lam bsgom pa'i tshul/ 'bras bu sangs rgyas kyi sa'o/ /dang po ni/ 'dir mi bshad de ma dag pa'i snang ba'i skabs su bstan zin to/ /lam la gsum ste/ gzhi dam tshig la gnas par bya ba dang / gang zag dkri ba'i tshul gang yin pa dang / nges shes bskyed la ting nge 'dzin ngo shes par bya ba'i phyir lam gyi sa mtshams gzhag pa'o/ /dang po ni lam thams cad kyi rtsa ba yin zhing / gang zag 'bring gi lam gyi gtso bo yin pas dam tshig nyi shu bskyangs par bya ste/ dbang dang dam tshig la gnas pa ni lam thams cad kyi gzhi yin no/ /zhes snang ba gsum gyi dkris zin nas dbang dang dam tshig ston par gsungs pa dang / rje sa pan gyis kyang brda don gsal ba las/ dbang thob zin pa'i gang zag la dang po nyid nas lta ba ston pa gsungs pas/ rje btsun gong ma'i phyag len ma 'chugs pa rnams la dkri tshul de 'dra zhig yod par snang yang / bar skabs su gdul bya la ltos nas/ dbang bskur dang po nas thob zin pa la khrid dmigs rnams phyi nas ston pa'i phyag len sgo yangs phyogs nas ston pa du ma zhig byung bar snang