[A:34a]nas// ! //gnyis pa rje btsun mkhas pa'i gtsug rgyan dkon mchog lhun 'grub kyi gsung rab las 'byung tshul bshad pa la gnyis te/ brgal lan tshangs pa'i rigs sngags nyid bshad pa dang / de'i don bsdus bshad pa'o/ /de'i dang po ni bshes gnyen chen po mus srad pas brgal zhing brtags pa'i lan rnam par nges pa tshangs pa'i rigs sngags zhes bya ba las 'di ltar 'byung ste/ na mo badzra dha ra ya/ stobs ldan mda' lnga'i 'jug pas ma sgrin par/ /dregs ldan lha brgya'i gtsug tu ngal bso mdzad/ /byams ldan bdud rtsi'i bde ba la dges pa'i/ /dpal ldan sa skya'i bla chen phyag gi gnas/ /gangs can ljongs 'dir kun mkhyen gnyis pa ru/ /rab grags rgyal bas lung bstan 'khor lo'i mgon/ /mkhas kun dga' ba'i mdzad pa bzang po yis/ /ston pa'i rgyal sa 'dzin khyod bsngags par 'os/ /gang gi 'phrin las snyog bral 'o ma'i mtsho/ /dpyod ldan mang po'i bsten byar rnam brtags pa/ /phyogs 'dzin mun pa'i khung bur nyal byed pa'i/ /blo chung brang 'gro'i tshogs kyi spangs so lo/ /rmad byung brgyud pa'i bzhed gzhung dbang gi rgyal/ /sgros ngan dbugs kyi dug can gyis 'khrud na/ /'phrin las 'od zer 'phro bar mi nus pas/ /lung rigs sngags 'dis gzhan zer ring du bya/ /chags sdang dug mtsho bsrub pa las byung ba'i/ /tshig rtsub nag po brtsegs pa'i kha dog tsam/ /blo ngan mgrin pa'i rgyan du re ba dag /khong khro'i mig me 'bar bar ma byed cig /de yang bdag cag rnams kyi 'dren pa dam pa 'gro ba lha dang