[A:34b]bcas pa thams cad kyi gtsug gi nor bu rgyal ba'i bstan pa la rgyal ba gnyis pa ltar lung bstan gyi bdud rtsi brnyes pa/ rtsod pa'i dus kyi thams cad mkhyen pa'i dbang po des/ thub pa'i bstan pa spyi dang / bye brag gi brgyud pa'i srol rmad du byung ba rnams ma 'dres la yongs su rdzogs pa'i sgo nas mtha' yas pa'i 'gro ba rnams skal ba bzang por mdzad pas gangs can gyi ljongs 'dir 'phrin las kyi 'od zer nyi ma ltar ches lhag par gyur pa la kun nas phrog par byed cing / dad pa tsam gyi rje btsun sa skya pa yab sras kyi rjes su 'brangs kyang / blo gros shin tu gzhon nu mar gyur pas gsung rab kyi tshogs mang du ma thos shing / lung dang rigs pa'i rgya mtsho ma mthong bas rang snang tsam gyis tshim pa'i skye bo chu skyar gyi brtul zhugs can 'ga' zhig 'di skad du/ sems bskyed brgyud pa med pa dang / /rjes bzung grangs nges med pa dang / /sta gon 'brel pa med pa dang / /slob dpon grangs nges med pa dang / /dbang bskur yongs dag med pa dang / /lus dkyil 'byung khungs med pa dang / /rgyas gdab rigs tshon med pa dang / /bza' ba'i dam tshig med pa dang / /chos ltar bcos nas chos min byed/ /smin par 'dod kyang 'dis mi smin/ /grol bar 'dod kyang grol mi nus/ /nor pa'i chos rnams dgag par bya/ /zhes rang gi 'grel pa dang bcas nas rgol bar byed do/ /de la rgol ba dang po ni/ spyir dbu ma lugs kyi sems bskyed 'di lam 'bras brgyud pa la med/ khyad par du rje btsun chen pos mdzad pa'i sems bskyed kyi yi ge ngor chen pas sgo rum nas brnyed