[A:40a]rjes 'dzin gyi skabs nyid du snyon mi nus par bshad pas/ gnyis ka ltar yang mi 'gal ba nyid du 'dod do/ /khyod la ni de khas len du mi 'dod de/ dbang bskur gyi grangs nges sta gon dang / sta gon gyi grangs nges rjes bzung la nges par ltos dgos par khas blangs pas/ rje btsun gong ma lnga dus rtag tu 'gal med du khas len pa'i dam bca' yang gting nas nyams pa yin la/ kho bo cag ni phyi ma'i grangs nges snga ma la ltos par mi 'dod cing / rjes 'dzin gyi slob ma'i grangs nges rnam snang mngon byang dang mthun par khas len par de'i tshe yang dbang bskur gyi slob ma'i grangs nges spyi rgyud nas bshad pa ltar 'dod pas bshad ma thag pa'i rgyud tshig gnyis po mtha' gcig tu 'gal ba yang mi 'dod do/ /gnyis pa ni rgol bas/ chos rje bla mas bzhed pa yin par byas nas/ snang gsum khrid kyi sngon du dbang bskur nges par byed dgos pa grub pa'i mthar byas pa de la 'di 'dri ste/ khyed kyi khrid tshul de skal ldan cig car ba'am/ skal dman rim 'jug pa gang gi lam rim yin/ dang po ltar na gang zag de khrid pa'i lam rim la dbang dang rim gnyis yan lag dang bcas pa'i bar du snang gsum khrid kyi slob ma dkri ba nges par byed dgos pa ma yin te/ de 'dra'i rigs can gyi gang zag la thun mong ba'i lam gyi rgyud sbyangs mi dgos par dang po nyid nas dbang rim gnyis 'brel pa can du byas chog pa rgyud kyi dgongs pa dang / dbang gi sngon du skyabs su 'gro ba dang sems bskyed pa tsam snon pa bla ma rnams kyi phyag len yin par rje btsun gong