[A:41a]dbang bstan par gzhung bshad mtha' dag nas 'byung bas snang gsum khrid kyi thog mtha' gnyis char du dbang bskur re re bya dgos par 'gyur ro/ /'o na ci snyam na/ bla ma dam pa'i zhabs pad btud de zhes pa ni bstan bcos dang mthun pa'i mchod brjod yin pas/ des de bstan par sems pa ni blo gros shin tu chung ba yin la/ nyams snang gi rten rnal 'byor pa la dbang gi smin pa sogs gzhung bshad rnams nas bshad pa skabs 'di'i snang gsum khrid kyi sngon du dbang bskur 'gro dgos pa'i shes byed du 'dod pa ni rdo rje'i tshig rkang gi bzhugs tshul rags pa tsam yang thos bsam gyi yul du ma byas pa'i 'chal gtam kho na yin te/ gzhung de'i bzhugs tshul la/ snang ba gsum lam rang rkang la sbyar ba dang / lam gyi gzhi bca' la sbyar ba gnyis las/ dang po ni/ gzhung de'i 'khor 'das thun mong ba'i gzhung tshom bu bdun po re res kyang 'tshang rgya ba'i cha rkyen lam 'bras bu dang bcas pa yongs su rdzogs pa re re ston pa yin la/ de'i tshe snang ba gsum du bstan pa'i gzhung nyung ngu des kyang snang ba gsum lam rang rkang la sbyar ba zhes bya ba'i ming can gyi lam 'bras bu dang bcas pa'i gdam ngag yongs su rdzogs pa zhig ston dgos pas/ de la dgongs nas gzhung bshad rnams su thos bsam dang bslab pas rgyud sbyangs pa dang / dbang gis sbyangs pa la sogs pa'i rnam gzhag de dag 'byung ba yin la/ snang ba gsum lam gyi gzhi bca' la sbyar te nyams su len pa'i skabs 'dir ni 'khor 'das thun mong ba'i gzhung tshom bu bdun