[A:42a]khrid yig de'i dngos bstan ji ltar 'chad ce na/ kho bo cag ni dngos bstan de khyab mthar bzung nas mi 'chad la/ 'phags pa'i yul lta bu na theg pa che chung dang / rgyud sde bzhi'i gdul bya rigs so sor nges pa yod kyang / bod na theg dman gyi gang zag dngos su med pas lam zhugs la theg chen pas khyab la/ ding sang dus dbang bskur ba shin tu dar che bas/ lam 'bras zhu ba po phal cher de gnyis gang rung la sngar zhugs zin pa shas che bas/ dang por dbang bskur ba byas kyang nyes pa cher med pa la dgongs nas de ltar bshad pa yin la/ de 'dra ba'i gang zag la snang ba gsum gyi lam ma bstan yang rung mod/ ding sang gi khrid tshul ni lam 'bras gzhung ji lta ba bzhin dkri ba'i lam rim yin pas de'i khrid kyi kha tshang ba'i phyir dang / gang zag des snang ba gsum gyi lam nyams su blangs kyang skyon med pa tsam la dgongs pa yin par 'chad pas/ khyed dang 'chad tshul 'dra ba min no/ /des na 'di ltar 'chad shes pa de'i tshe dka' ba'i gnas su sems pa thams cad rang grol la 'gro ba yin gyi/ blun po rnams kyi kha 'dzin gyi chos kyi spyan dang ldan pa rnams la 'phyar kha'i rgyur 'gyur bas smra ba mang po skyung na mdzes pa yin no// //smras pa/ stobs ldan rmongs pas dregs pa yis/ /khyab 'jug brnyas pa'i le len gyis/ /sa gsum shor nas rang nyid kyang / /dam du bcing ba thob par 'gyur/ /rgol ba gsum pa ni/ sta gon 'brel pa med pa dang / zhes pa'i rgyas bshad du slob ma smin byed rdul tshon gyi dkyil 'khor gcig tu thog