[A:50b]te/ slob dpon rin po ches mdzad pa'i sambu Ta'i TIka chen dang yi ge de gnyis la 'gal ba du ma zhig yod pa'i phyir ro/ /ji ltar yod ce na/ de kho na nyid kyi yi ge der/ rtse dgu pa ni dam tshig gi rdo rje/ rtse lnga pa ye shes kyi rdo rje zhes 'byung la/ TIka chen las/ rdo rje mkha' 'gror rtse dgu pa ye shes kyi rdo rje/ rtse lnga pa dam tshig gi rdo rje zhes 'byung bas zhes sogs gsungs pa gnyis dngos su 'gal bas so/ TIka chen gyi de ni rgyud don la zhugs pa yin te/ rdo rje mkha' 'gro las/ rtse mo dgu ru bshad pa ni/ /ye shes rdo rjes 'gro ba sgrol/ /zhes rtse dgu pa gsungs nas/ de nas dam tshig rdo rje yi/ /mtshan nyid yang dag bshad par bya/ /zhes sogs kyis rtse lnga pa bshad pa'i phyir ro/ /des na rgyud dang slob dpon rin po che'i gsung gnyis char dang 'gal ba'i rdor dril gyi ngos 'dzin rje btsun chen pos ga la mdzad/ yang rtse dgu pa'i lha 'god tshul yang mi mthun te/ yi ge de las steng gi rwa dgu ni phyogs kyi rwa bzhi rigs bzhi/ dbus nam mkha' kun tu bzang po/ 'og gi dgu ye shes lnga/ tshad med bzhi zhes bshad la/ TIka chen las/ steng gi rwa brgyad byang chub sems dpa' brgyad de/ padma'i phyag dang byams pa dang / /zhes sogs dang / 'og gi rwa brgyad ni lha mo brgyad de/ rdo rje lcags kyu zhags pa ma/ /zhes sogs dang / dbus kyi rwa ni/ rdo rje rnam par snang mdzad do/ /zhes 'byung bas so/ /de bzhin du rje sa chen gyi sras kyi thu bo mi nyag pradznyA dzwa la'i sambu Ta'i TI kar yang TIka chen dang mthun pa kho na 'byung gi gcig shos dang mthun pa gtan mi 'byung ngo /