[A:༩༡ན]བཀག །ཆོས་རྗེས་བཤད་པའི་སྟོན་མོ་དེ། །དཔའ་བོའི་སྟོན་མོར་ཁས་བླངས་ཤིང་། །དཔའ་བོའི་སྟོན་མོ་རྗེ་བཙུན་གྱིས། །ཚོགས་འཁོར་དབྱེ་བར་བཤད་ཅེས་པ། །གཉིས་ཀ་ཅིག་ཅར་ཁས་བླངས་ནས། །ཆོས་རྗེས་བཤད་དེ་ས་སྐྱ་པའི། །རང་ལུགས་མིན་ཞེས་སྨྲ་བྱེད་པ། །འདི་ཡང་འགལ་བ་ལྟག་སྤྲོད་ཡིན། །ཁུ་དབོན་གཉིས་ཀ་བཞེད་པ་དེ། །ས་སྐྱའི་ཆོས་སུ་མི་རུང་ན། །ས་སྐྱའི་ཆོས་ཀྱི་མཚན་གཞི་ནི། །ཀུན་མཁྱེན་གྱིས་ཀྱང་རྙེད་མི་ནུས། །ས་པཎ་འགེགས་པའི་ས་སྐྱ་པ། །རྙིང་པ་དེ་དག་ཆེས་ཆེར་བླུན། །དེ་ཕྱིར་ཕྱི་དྲོའི་ཁ་ཟས་དང་། །ཤ་ཆང་རོ་ལ་རྔམས་པ་ཡི། །ཟོལ་གྱིས་ཚོགས་འཁོར་བྱེད་དོ་ཞེས། །འཇིག་རྟེན་པ་རྣམས་རྨོངས་བྱེད་པའི། །འདོད་ལྡན་དེ་དག་ལྷག་སྤྱོད་ཀྱི། །ཏིང་འཛིན་བསྒོམ་པ་ཇི་བཞིན་ནོ། །ཞེས་གསུངས་སོ། །དེ་རྣམས་ཀྱི་ཡང་ལན་དུ་མཁན་ཆེན་བཟང་བཀྲས་པས་སྙན་བརྒྱུད་འཁྲུལ་སེལ་ལས། །འདོད་ལན་ཐེབས་པའི་ཐལ་འགྱུར་ལ། །འཁོར་གསུམ་རིགས་པ་ཤེས་པས་ཁྲེལ། །ཕོ་མོ་ཚོགས་པ་རྣམས་གཉིས་ཏེ། །གང་ཟག་ཕལ་ལ་གྲགས་པ་དང་། །རྡོར་སེམས་བསྒོམ་པའི་ཏིང་འཛིན་གྱི། །ལྷ་དགུ་ལ་སོགས་དཀྱིལ་འཁོར་དང་། །དཔའ་བོ་དཔའ་མོ་རྣམས་ཀྱང་ཡོད། །དེ་ལྟར་མིན་ན་ཚོགས་འཁོར་གྱི། །ཚིམ་པ་ལྔ་ཡང་དཀའ་བར་གནས། །རྩ་ཁམས་དཔའ་བོ་དཔའ་མོ་རུ། །གདོད་ནས་གྲུབ་པར་ཁྱོད་ཉིད་འདོད། །གཞན་ཡང་ཚོགས་འཁོར་རྩོད་སྤོང་ལས། །ཕྱི་ནང་མཁའ་འགྲོ་ཞེས་ཀྱང་གསུངས། །རྩ་ལྟུང་འབྱུང་དང་མི་འབྱུང་བ། །ཀླུ་སྒྲུབ་ལ་སོགས་སྡོམ་ལས་གྲོལ། །དེ་ལྟ་མིན་ན་དེ་བཞིན་བྱུང་།