[A:༤༣བ]ཉམས་ལེན་ཁུངས་མ་ཞིག །གངས་ཅན་འདི་ན་ཡོད་དམ་མེད། །ཡོད་ན་དེ་ཡི་མཚན་གཞི་དྲི། །མེད་ན་ཚུལ་དེ་བཤད་པ་ལ། །དགོས་པ་ཅི་ཞིག་ཡོད་དམ་ཅི། །ཞེས་པ་བརྗོད་ན་ལན་ཅི་ཞིག །ལུང་རིགས་གཏན་ཚིགས་དང་བྲལ་བའི། །གཞན་ལ་བབ་ཅོལ་སྨྲ་བ་འདི། །སྐྱེས་བུ་རྫ་ཡི་ཁུར་ཐོགས་ནས། །རྡོ་བའི་གཡུལ་ངོར་འཇུག་པ་འདྲ། །དེ་དག་རང་དགའི་དྲི་ལན་དུ། །མདོར་བསྡུས་ཙམ་ཞིག་བརྗོད་པ་ཡིན། །ཞེས་གསུངས་སོ། །ཡང་ངོར་ལུགས་ཀྱི་བཞེད་པའི་སྙིང་པོ་རྗེ་དཀོན་མཆོག་ལྷུན་གྲུབ་ཀྱི་གསུང་ངག་འཆད་ཐབས་ཀྱི་མན་ངག་གསང་བ་སྒོ་འབྱེད་ལས་འཕྲོས་པའི་དྲིས་ལན་ཟབ་དོན་སྙིང་པོ་ལས། །དེ་ལྟར་བཤད་མ་ཐག་པའི་ཁྲིད་ཚུལ་དེ་རྣམས་ཀྱི་གོ་རིམ་གྱི་ངེས་པ་དེ་ལྟར་འབྱུང་བའང་རྗེ་བཙུན་གོང་མ་ཉིད་ཀྱི་བཞེད་པ་ཡིན་ཏེ། རྗེ་ས་ཆེན་གྱི་དབང་བཞི་ངོ་སྤྲོད་ལས། མཚན་ཉིད་ལྡན་པའི་བླ་མ་ལ། །སྣོད་དང་ལྡན་པའི་སློབ་མ་ཡིས། །དབང་བཞི་རྫོགས་པར་ཐོབ་ནས་ནི། །རྒྱུ་དུས་ལྟ་བས་རབ་བརྒྱན་པའི། །བུམ་དབང་བསྐྱེད་རིམ་ཐོག་མར་བསྒོམ། །ཞེས་དང་། དེའི་རང་འགྲེལ་ལས། ཐོག་མར་བླ་མ་ཞིག་ལ་དབང་བཞི་རྫོགས་པར་ཐོབ་པ་གལ་ཆེ། དབང་དེའང་བརྡ་ཙམ་བྱིན་རླབས་ཙམ་མ་ཡིན་པར། གྲུབ་པའི་བླ་མ་བརྒྱུད་པའི་བཀའ་མ་ཆད་པ། ལྷད་མ་ཞུགས་པ་ཞིག་ལ་དཀྱིལ་འཁོར་ཆེན་པོར་དབང་བསྐུར་བ་ཐོབ་དགོས། དེ་ནས་ཐོག་མར་ལྟ་བ་བསྒོམས་ལ། དེའི་ཡེ་ཤེས་ཅུང་ཟད་སྐྱེས་པ་ན་ཞེས་སོགས་དབང་རྗེས་དེ་མ་ཐག་པར་ལྟ་བ་འཁོར་འདས་དབྱེར་མེད་སྟོན་པར་གསུངས་པ་དང་། ཨ་སེང་མ་ལས། སྣང་བ་གསུམ་གྱིས་ལམ་གྱི་གཞི་བཅས་ལ། །