[A:43b]nyams len khungs ma zhig /gangs can 'di na yod dam med/ /yod na de yi mtshan gzhi dri/ /med na tshul de bshad pa la/ /dgos pa ci zhig yod dam ci/ /zhes pa brjod na lan ci zhig /lung rigs gtan tshigs dang bral ba'i/ /gzhan la bab col smra ba 'di/ /skyes bu rdza yi khur thogs nas/ /rdo ba'i g.yul ngor 'jug pa 'dra/ /de dag rang dga'i dri lan du/ /mdor bsdus tsam zhig brjod pa yin/ /zhes gsungs so/ /yang ngor lugs kyi bzhed pa'i snying po rje dkon mchog lhun grub kyi gsung ngag 'chad thabs kyi man ngag gsang ba sgo 'byed las 'phros pa'i dris lan zab don snying po las/ /de ltar bshad ma thag pa'i khrid tshul de rnams kyi go rim gyi nges pa de ltar 'byung ba'ang rje btsun gong ma nyid kyi bzhed pa yin te/ rje sa chen gyi dbang bzhi ngo sprod las/ mtshan nyid ldan pa'i bla ma la/ /snod dang ldan pa'i slob ma yis/ /dbang bzhi rdzogs par thob nas ni/ /rgyu dus lta bas rab brgyan pa'i/ /bum dbang bskyed rim thog mar bsgom/ /zhes dang / de'i rang 'grel las/ thog mar bla ma zhig la dbang bzhi rdzogs par thob pa gal che/ dbang de'ang brda tsam byin rlabs tsam ma yin par/ grub pa'i bla ma brgyud pa'i bka' ma chad pa/ lhad ma zhugs pa zhig la dkyil 'khor chen por dbang bskur ba thob dgos/ de nas thog mar lta ba bsgoms la/ de'i ye shes cung zad skyes pa na zhes sogs dbang rjes de ma thag par lta ba 'khor 'das dbyer med ston par gsungs pa dang / a seng ma las/ snang ba gsum gyis lam gyi gzhi bcas la/ /