[A:༤༨ན]བསྟན། དེ་ནས་དབང་བསྐུར། དེ་ནས་ལྟ་བ་སོགས་ཀྱི་ཁྲིད་སྟོན་པའི་ལུགས་གཅིག་སྟེ་གཉིས་སུ་མཛད་ནས། ཕྱི་མ་རྩལ་དུ་སྟོན་པ་ནི་གཏན་མ་ཡིན་ཏེ། བཤད་ཚུལ་གོང་འོག་གཉིས་པོ་དེ་ལ་དེ་ཙམ་གྱིས་ཁྱད་པར་འབྱེད་པའི་དམིགས་བསལ་དང་དོན་ཐོབ་ཅི་ཡང་མི་སྣང་བ་དང་། སྤྱིར་སྣང་བ་གསུམ་གྱི་སྔོན་དུ་དབང་བསྐུར་བ་མཛད་པའི་ཕྱག་ལེན་དེ་གདུལ་བྱའི་གང་ཟག་ལ་ལྟོས་ནས་བྱར་རུང་བའི་སྐབས་དུ་མ་ཡོད་ཀྱང་། དེ་ཙམ་གྱིས་སྣང་བ་གསུམ་གྱི་སྔོན་དུ་དབང་བསྐུར་ངེས་པར་བྱེད་དགོས་པ་བསྒྲུབ་པར་མི་ནུས་ཤིང་། ནུས་ཀྱང་འཆད་ཚུལ་དེ་རྡོ་རྗེ་ཐེག་པའི་རྒྱུད་གཞུང་ནས་བཤད་པའི་སྐལ་ལྡན་ཅིག་ཅར་བ་དང་། སྐལ་དམན་རིམ་འཇུག་པའི་ལམ་གཉིས་པོ་གང་ཡིན་བརྟགས་ན་ཕྱོགས་གཉིས་པོ་གང་དུའང་ཁས་ལེན་ནུས་པ་དཀའ་བར་སྣང་ཞིང་། གཞུང་ཇི་ལྟ་བ་བཞིན་དུ་བཀྲི་བའི་གཞུང་ཤིང་གི་བབས་དང་། ཕྱག་ལེན་གྱི་རིམ་པ་དེ་གཉིས་འགྲིགས་པའང་ཤིན་ཏུ་དཀའ་བས་གཞུང་ཇི་ལྟ་བཞིན་དུ་བཀྲི་བའི་གཞུང་ཤིང་དངོས་ལ་གོ་རིམ་ངེས་པ་ཅན་དེ་ལྟ་བུ་ཞིག་ངེས་པར་དགོས་པར་མི་བཞེད་པར་མཆིས་ལགས། དེ་ལྟ་ན་གསང་བ་སྒོ་འབྱེད་ལས། དང་པོ་ཉིད་ནས་དམ་ཚིག་མ་ཐོབ་པ་ཐོབ་པར་བྱེད་པ་མངོན་པར་དབང་བསྐུར་བ་བཤད་པ་མ་ཡིན་ནམ་ཞེ་ན་ཡིན་མོད། དེས་དེ་ལྟར་བསྟན་པ་མཐའ་གཅིག་ཏུ་ངེས་པ་མ་ཡིན་ཏེ། དམ་ཚིག་མ་ཐོབ་པ་ཐོབ་པར་བྱེད་པ་ལ་དབང་གི་མངོན་པར་རྟོགས་པ་བརྒྱད་དང་ལྡན་པའི་སྒོ་ནས་རྡུལ་ཚོན་གྱི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་བ་ཚུལ་བཞིན་དུ་བསྒྲུབ་དགོས་པ་ཡིན་ལ། དབང་བསྐུར་ཞུ་བ་པོའི་སློབ་མ་དེ་ལའང་