[A:53b]tshon gyi dkyil 'khor gcig tu dbang lan mang du bskur ba sa skya pa'i lugs min/ bu ston pa'i slob brgyud dag gi lugs yin zer ba rje btsun chen po ngor pa dang bzhed pa gcig pa 'dug pas sa skya pa'i khyu nas 'bud kyang bu ston pa'i slob brgyud du 'ong don med pas thugs dran bsten pa zhu zhes nyams ldan dang bcas gsungs so/ yang mkhas pa'i dbang po dkon mchog lhun grub kyis tshangs pa'i rig sngags su mgo mtshungs dang / rnal ma'i lan gnyis su mdzad nas/ dang po la/ 'o na smin byed kyi dbang tshar re la gzhi bsnyen dang sa chog sogs zhal dang 'dra ba'i cho ga'i gzhi chen po mtha' dag tshar re bya dgos par 'gyur te/ smin byed re la sta gon re byed dgos pa gang zhig brgyad po de smin byed la dgos pa'i cho ga yin par mtshungs pa'i phyir/ mi mtshungs te bsnyen pa kha gso tsam dang / dkyil 'khor gyi khang pa rnying par sa chog ma byas kyang rung bar bshad pas so snyam na/ 'o na sngar byas zin pa'i gzhi bsnyen dang / sa chog rnams dang / da lta'i slob ma'i don du bzhengs pa'i dkyil 'khor la 'brel pa de med pas na/ gzhi bsnyen 'brel pa med pa dang / /sa chog 'brel pa med pa dang / /zhes pa'i nyes pa re'ang 'byung ngo zhes pa dang / gzhan yang rdul tshon gyi dkyil 'khor gcig tu slob ma gcig las gzhan la dbang bskur du mi rung bar 'gyur ba'i gnod byed paN chen gyi gsung de dang phal cher mthun pa zhig 'god par mdzad nas/ de'i rjes su yang 'brel zla'i don slob ma la mi byed par cho ga de'i byed las la byed zer na/ 'o na sta gon dang 'jug pa'i tshe las