[A:54b]bris pa gang la byed/ dang po ltar na sta gon de la ltos pa'i dkyil 'khor bsgrubs zin pa brgya byin gyis kyang sgrub mi nus/ phyi ma ltar na ras bris kyi phyogs la sta gon bya mi rung bar 'gyur te/ sta gon de'i sngon du ras bris de bris zin pa'i phyir dang / dkyil 'khor bris zin nas sta gon ji ltar byed ces smras na chos dang mthun pa'i lan mi 'dug pa'i phyir zhes gsungs/ gnyis pa rnal ma'i lan la rgol ba'i bsam pa blang pa/ rang lugs nyes med du bstan pa/ rgol ba po nyes pa can du bstan pa rnams su mdzad nas/ dang po la khyod ltar na rjes bzung gi skabs kyi slob ma nyer lnga po'i don du bzhengs pa'i dkyil 'khor der nyer lnga las gzhan smin byed mi rung ste/ nyer lnga las gzhan pa'i slob ma rnams dang dkyil 'khor de la 'brel pa med pa'i phyir dang / dngos gzhi phyi ma rnams la sta gon med pa'i phyir snyam du sems pa'o zhes gsungs/ rang lugs nyes med du bstan pa la snang gsum gyi khrid zin pa'i slob ma mang po la grangs nges med par rjes bzung bya rung bar grub cing / slob ma de dag gi don du bzhengs pa'i dkyil 'khor dang de rnams shin tu 'brel pa dang / sa lha dang lha sta gon byas pa'i dgos pa ni/ sa phyogs der dkyil 'khor bzhengs su rung ba dang / slob ma'i ched du dkyil 'khor bris te gzhan don bya ba'i gnang ba zhu ba dang / byin gyis brlabs pa'i ched yin la/ de tsam ni sta gon gcig pu des grub/ bum pa dang slob ma sta gon yang ji tsam skabs su babs pa'i tshe byas pas/ dbang zhu ba ji snyed pa dag la mngon par rtogs pa brgyad car tshang