[A:57a]dgos pa smyon med grub/ /'di yis khyed kyi grub mtha' de'i/ /ngan tshang thams cad brtol ba yin/ /zhes gsungs/ yang sgyi chu ba buddha shrI'i yang lan nor bu'i phreng bar tshangs pa'i rig sngags kyi mgo mtshungs kyi lan rnams la lan 'debs gang yang ma mdzad la/ rnal ma'i lan gyi rang lugs nyes med du bstan pa rnams kyi yang lan du/ 'di ni rgya bod kyi rdo rje 'dzin pa rnams la med pa'i grub mtha' ste/ khyod kyi dbang bskur phyi ma rnams la bdag bskyed kyang mi dgos par 'gyur te/ bdag bskyed byas pa'i dgos pa ni bdag nyid lhar bskyed pa yin la/ de tsam gyis skabs don bdag bskyed gcig pu des grub zin par mtshungs pa'i phyir zhes pa dang / de bzhin du mdun bskyed kyi dgos pa dbang len pa'i dmigs rten dang / mchod pa'i dgos pa bsod nams kyi tshogs gsog pa dang / bdag 'jug gi dgos pa dam tshig nyes pa bsal nas slob ma byin gyis brlabs pa'i phyir dang / bum pa sta gon gyi dgos pa dbang bskur ba'i phyir rnams yin la/ dgos pa de dag mdun bskyed sogs de dag dang po de rnams kyis grub zin pas/ dbang phyi ma rnams la mdun bskyed sogs mi dgos par 'gyur ro zhes mtshungs pa brjod nas/ skabs don grub kyang cho ga kha lag tshang ba'i phyir yin zer na sa lha sta gon la'ang ci'i phyir mi mtshungs/ gal te dngos gzhi'i sngon 'gro gtor ma nas mjug gi bya ba'i bar cho ga tshar gcig yin pas mi mtshungs snyam na/ dbang gi chos brgyad po de dag cho ga tshar gcig yin cing / rjes bzung bsnyen pa sa chog