[A:6b]yang mi 'thad par gsungs/ zhe 'dod kyi lan la sems bskyed kyi yi ge de gsar du rnyed pa dang / de la lung gi rgyun tsam med du chug kyang / de tsam gyis sems bskyed kyi brgyud pa med par mi 'gro/ de bas khyed rang rgyud sde nas bshad pa'i dbang gi sngon 'gro'i sems bskyed cig mi 'dod na shin tu skal ba dman/ 'dod na sangs rgyas nas rje btsun rtse mo yan chad du sems bskyed kyi yi ge de med kyang / de'i brjod bya dang mthun pa'i sems bskyed kyi sdom pa'i rgyun yod pa dang / rje btsun nas ngor chen rdo rje 'chang gi bar du'ang bde kye gnyis kyi dbang gi sngon du yi ge de dang mthun pa'i sems bskyed kyi sdom pa'i phyag len ma nor ba yod pas/ phyag len de dang mthun pa'i yi ge su zhig gis byas kyang de'i steng nas sems bskyed bya rung ste/ dper na dbang chu chen mo'i lung ma thob kyang / kye rdor man ngag lugs kyi dbang thob la ma nyams pa'i rdo rje slob dpon zhig gis de'i steng nas dbang byar rung ba dang / karma sha taM lta bu'i steng nas sdom pa thob la ma nyams pa'i mkhan po zhig gis las chog tshad ma gang rung zhig gi steng nas sdom pa 'bogs rung ba bzhin dang / snyan brgyud yi ger bris pa thams cad la des mtshon zhing / des na rje btsun chen pos mdzad pa'i yi ge de ni rgyud sde nas bshad pa'i sems bskyed kyi cho ga thun mong ma yin pa yin/ dbu ma lugs kyi sems bskyed kyi cho ga ma yin pas/ dbu ma lugs kyi sems bskyed lam 'bras pa la yod med ci ltar yang lugs 'di'i sems bskyed byed pa la phan gnod gang yang med gsung pa'i lan mdzad do/ /rgol