[A:66b]rtogs mtha' dag nyams su blang rung bar gsungs pas/ lugs 'di la slob dpon gyi dbang ni dbang bzhi char la ngos 'dzin pa yin cing / bde mchog sogs la ni mi mtshungs te/ de dag las ni yo ga dang sgo bstun nas dam tshig gsum sbyin pa la slob dpon gyi dbang du bshad pas so/ /de la dgongs nas sa chen gyis bde mchog dkyil chog las brtul zhugs kyi dbang song nas slob ma'i rigs can rnams bkye ste slob dpon gyi 'os su gyur pa gcig la dam tshig gsum mtha' rten dang bcas pa byin nas slar thams cad la gong ma gsum bskur ba'am/ yang na brtul zhugs kyi rjes la thams cad la thun mong du gong ma gsum bskur nas/ phyis slob dpon gyi 'os su gyur pa dag la dam tshig gsum 'khor dang bcas pa sbyin par gsungs pa yin no/ /des na khyed kyi lag len de ni bde kye gnyis so sor ma phyed cing / dbang chu gnyis po gang gi dbang skur tshul dang mi mthun la/ nub gcig la dbang bzhi rdzogs par slob ma re re nas bskur ba dang / gcig car du bskur ba'i lugs gnyis ka yod pa ni sngar gyi dbang chu chen mo'i lung de'i dngos shugs kyis bstan pa yin gsungs/ rgol ba'i lag len rigs pa dang 'gal ba la/ slob dpon gyi dbang de nyer lnga tshun gyi slob ma ji tsam yod pa la cig car rung bar thal/ slob dpon gyi dbang de dngos gzhi'i dbang yin/ dngos gzhi'i grangs nges sta gon dang / sta gon gyi grangs rjes bzung la ltos pa ni gang zhig nyer lnga tshun gyi grangs zung du ma gyur pa du ma cig car du rjes su 'dzin rung ba'i phyir/ rtags