[A:67a]gsal khas blang / khyab pa mkhas pa'i mdun sar dris shig ces gsungs so/ /de dag gi don bsdus don brgyad pa las/ rdo rje slob dpon dbang bskur gyi/ /slob ma grangs nges bya dgos pa/ /gsang ba spyi rgyud la thug na/ /gsang ba spyi rgyud bya rgyud yin/ /bya rgyud rnams las slob dpon dang / /slob ma'i dbang gi bzlas phye ba'i/ /rdo rje slob dpon dbang skur ba'i/ /don dang tha snyad gnyis ka med/ /khyad gzhi med pa'i khyad chos mtshar/ /rje btsun gong mas de drangs pa/ /rung mthun lung du drangs pa yin/ /dper na rtsa ltung bcu bzhi yi/ /lung sbyor mdo nas mdzad pa bzhin/ /rung mthun lung dang bshad pa'i khungs/ /nor ba shin tu bzhad gad che/ /spyi rgyud dgongs pa chos dbyings ltar/ /zab cing shin tu rtogs dka' ba/ /tshig tsam 'don pa lhur byed pa/ /khyed kyis re zhig rtogs mi nus/ /shes par 'dod na mkhas pa bsten/ /nges bzung can gyi bskur tshul de/ /byed na dbang gong dngos gzhi yang / /de lta'i tshul gyis bskur dgos pa/ /skabs 'dir gong ma bzhed gyur na/ /khyed la tshul de yod min pas/ /ngal ba'i 'bras med glang chen khur/ /gzhan du mchog dbang rnam pa gsum/ /slob ma'i dbang du khas longs shig /ces gsungs so/ de dag gi lan du mkhan chen bzang bkras pa'i snyan brgyud 'khrul sel las/ tshangs ba'i rig sngags kyi bzhed pa bkod pa'i rjes su/ bshad tshod thams cad kun gyi min/ /zer ba ngan 'gran phal pa'i lugs/ /'phrin las chen po'i sla chos kyis/ /dbang bskur