[A:72a]'byung bas zhes sogs gsungs pas dngos su 'gal zhing / rtse dgu pa'i lha 'god tshul yang mi mthun te/ yi ge der steng gi rwa dgu'i phyogs kyi bzhi rigs bzhi/ mtshams kyi bzhi yum bzhi/ dbus nam mkha' kun bzang / 'og gi dgu ye shes lnga/ tshad med bzhi zhes 'byung / TIka chen las/ steng gi rwa brgyad byang chub sems dpa' brgyad de padma'i phyag dang / byams pa dang zhes sogs dang / 'og gi rwa brgyad ni lha mo brgyad de rdo rje lcags kyu zhags pa ma zhes sogs dang / dbus kyi rwa ni rdo rje rnam par snang mdzad do zhes bshad pas so/ /de bzhin du mi nyag pradznyA dzA la'i sampu Ta'i rnam bshad du yang TIka chen dang mthun pa kho na 'byung gi yi ge de dang mthun pa mi 'byung la/ bla ma 'ga' zhig rje btsun gyis mdzad nges pa'i yi ge zhig kyang yod nges pas btsal dgos gsungs kyang / bla ma spyil sgom gyi lam 'bras kyi yig cha las/ rje pa'i zhal nas rdo rje dang / dril bu dang / phreng ba'i de nyid gcig byed par bsam pa la ma grub ces 'byung bas brtsal yang ngal ba tsam du zad do zhes gsungs so/ /de'i don bsdus don brgyad pa las kyang / brtul zhugs slob dpon dbang bskur gyi/ /dbang rdzas yongs dag bsdus pa yi/ /nam yang bskyed du mi rung ba'i/ /gong ma'i lung khungs ci zhig yod/ /khyed dag yongs dag ci ltar byed/ /rje btsun gong mas ma bshad kyang / /cho ga gsum bskyed sogs sbyor na/ /mngon byang lnga las bskyed rung zhes/ /bshad na khyed cag ci zhig smra/ /khyed kyi tshad mar khas blangs pa'i/ /rdo rje dril