[A:72b]bu'i de nyid las/ /bshad pa'i lha yi bskyed tshul dang / /dbang chu nas bshad lha de dag /shar nub ri bzhin ring du gyur/ /de gnyis 'gal spong ji ltar byed/ /khyed kyi bla mas mdzad pa yi/ /dkyil chog dpag bsam ljon shing las/ /bshad pa'i rdor dril bskyed chog dang / /rje btsun rtse mo'i dbang chu gnyis/ /snang mun bzhin du 'gal bar gyur/ /bka' srol gnyis la de mi rung / /gal te de ltar bya rung bar/ /bshad pa'i gong ma'i lung yod na/ kho bo khyed kyi rjes su 'brangs/ /de phyir ston pa'i dus la babs/ /zhes gsungs so/ /de rnams kyi yang lan du mkhan chen bzang bkras pa'i snyan brgyud 'khrul sel las/ slob dpon slob ma dbang rdzas gsum/ /rigs lngar bskyed pa 'dra ba'i mu/ /mi bskyod me tog phog pa'i lha/ /rigs lngar bskyed pa mi 'dra'i mu/ /slob ma de bzhin dang mtha' gnyis/ /rigs lnga so sor bskyed pa dang / /dang po mi bskyod phyi ma gnyis/ /rigs lngar bskyed pa gnyis min mur/ /mkhas pas bshad ltar thun mong dang / /lam dus bskyed chog thun mong min/ /yang na rgyu lam khyad par yin/ /de 'dra 'gal 'dod blo gros rtsing / /de phyir lam dus khyab mtha' 'dzin/ /zhes pa dang / rnam snang dbang rdzas med pa dang / /phyi ma gnyis la'ang gzhi med pas/ /mi 'gal brdzun zog ma yin nam/ /rang nyes slob dpon ma bkod cig /rdor dril bskyed chog de 'dra ba/ /man ngag med pa'i 'ol tshod tsam/ /lam dus dbang gi yig chung dang / /khyed kyi lam dus mi 'gal na/ /dngos bstan min par yongs su grags/