[A:80a]byung ba'i rin 'byung aM nyid las logs su gyur pa'i phyir zhes pa lta bu gnas skabs dang po la dgongs par song bas dpyad pa de lus dkyil gyi skabs 'dir 'jug pa dka'o/ /des na phyogs gnyis kyi gsung de dag gi go don la legs par brtags na ngag 'don ma mthun pa tsam ma gtogs/ don gyi cha la mi mthun pa cher med pa 'dra snyam pa rang nyid kyi blo la shar ba tsam ste/ da dung blo gros dang ldan pa dag gis legs par dpyad dgos so// //bdun pa lus dkyil gyi lha la rgyas btab rigs mtshon yod med kyi rnam gzhag la/ mus srad pa chen po'i rgyas btab rigs mtshon med pa dang zhes pa'i rgyas bshad du/ yang kha cig rgyas btab kyi skabs su sambu Ta las/ rdo rje sems dpa' zhes byar bshad/ /bde ba dam pa ru ni brjod/ /ces pa 'khor lo drug tu 'dod pa rnams kyi lugs la spyi gtsug gi 'khor lo rdo rje sems dpa' bsgom pa la 'bru mnan pas chog mod/ man ngag 'di pa'i lugs la rgyas 'debs kyi lha bstan pa yin cing / de dang mthun par slob dpon dgra las rnam rgyal gyi phyag rgya bzhi'i rgyas 'debs las/ kun gyi dbang bskur gnas su ni/ rdo rje sems dpa' zla ba'i mdog /ces bshad pas lus dkyil gyi lha la rdo rje sems dpas rgyas 'debs rgyud dang rgya gar ba'i dgongs pa yin par gsal lo zhes zer zhing / ngag 'don gyi skabs su lus dkyil gyi lha thams cad la rdo rje sems dpas dbu brgyan zer ro/ /de las sambu Ta'i lung de'i rigs bdag gi rgyas btab ston pa gang las bshad/ gnad kyi gsal byed las