[A:80b]ni/ gsang ba las ni sa'i khams/ /zhes pa nas brtsam te/ chos kyi skur ni rab tu grags/ /zhes pa'i bar gyis rang byung gi ye shes kyi mtshan nyid ston pa las/ de la rgyas par bstan pa dang / bsdus te bstan pa dang / shin tu bsdus te bstan pa'o/ /dang po la gsum/ rten zhu ba 'byung ba lngar bstan pa/ brten pa bde ba ye shes lngar bstan pa/ de nyid rigs lngar bstan pa zhes gsungs pa'i rigs lngar bstan pa'i skabs su/ shin tu rnam dag ye shes che/ /rdo rje sems dpa' zhes byar bshad/ /ces pa'i tshig rkang gnyis bsdebs te mi bskyod pa dang rdo rje sems dpa' gnyis ka phyogs gcig tu thams cad bdag nyid kyi ston pa'i gzhung yin pas/ de ni rgyas par ston pa'i skabs yin la/ bde ba dam pa ru ni brjod/ /ces pa ni/ bsdus te bstan pa la rten thig le bsdus te bstan pa dang / brten pa bde stong bsdus te bstan pa gnyis kyi/ brten pa bde stong bsdus te bstan pa yin par gsungs pas/ gzhung mtshams kyang tha dad cing rigs bdag gi rgyas gdab ston par dogs pa'i gnas tsam yang med la/ rang blos sbyar bas rje btsun gong ma'i lugs su 'gyur ram/ slob dpon dgra las rnam par rgyal ba'i gzhung yang pho brang drug pa ston pa'i gzhung yin/ rigs bdag gi rgyas gdab ston pa'i gzhung ma yin te gzhung gi skabs la dpyad pas shes pa yin no/ /de ltar na sgrub byed rnam par dag pa med bzhin du/ rje btsun gyi gsung rnams dor nas gzhan du smra ba 'di la dgos pa ci zhig yod/ 'o na rje btsun gong ma'i gsung las ji ltar bshad ce na/ sras