[A:81b]bshad pa'i khyad par dbu rgyan rang chas can dang / dbang dngos su blangs pa'i khyad par du bstan pa/ rgol bas 'phags pa'i lung phyogs snga la gnod byed du drangs pa na sras don ma'i rang lugs bkag par bstan pa/ de dang de mi 'gal ba'i skyon spang byas pa na phyogs snga ma gnod byed du 'phangs pa thams cad rgol ba rang la log pas lung rigs kyi go ba ma chags par bstan pa/ grub mtha'i gting ma tshugs par lung 'dren mang pas gong ma lnga 'gal ba can du khas len dgos pa rnams byung ba yin no zhes gsungs la/ tshar chen chos kyi rgyal po'i rdo rje'i 'khrul 'khor gyi zegs mar smra ba bdun pa lus dkyil gyi lha la rgyas gdab rigs mtshon med pa'i sgrub byed du rdo rje sems dpas rgyas gdab ces zer ba dang / pho brang lnga'i gtso bo lnga la sras don mar rnam snang la sogs pa rigs lnga so sos rgyas gdab pa dang / 'phags pa rin po ches gtso bo lnga la rdo rje sems dpas rgyas 'debs par gsungs pa la/ de gnyis dgongs pa gcig pa'i sgrub byed du/ de'i skabs kyi rigs lnga dang rdo rje sems dpa' khyad par med par byas nas/ rgyas 'debs de rang rigs kyi rgyas gdab kyang yin la/ rdo rje sems dpa'i rgyas gdab kyang yin par 'dod do/ /de ltar na lus dkyil gyi lha rnams la rdo rje sems dpas rgyas btab pa rigs mtshon med pa ma yin par thal/ rigs mtshon yod pa'i phyir/ der thal/ rang rigs kyi rgyas gdab yod pa'i phyir/ der thal/ rdo rje sems dpa'i rgyas gdab yin pa'i phyir/ 'khor gsum/ sambu Ta'i lung gis bstan pa'i sgrub byed gnad kyi