[A:82a]gsal byed las ma bshad do zhes pa'ang mi 'thad de/ der rgyud 'chad pa'i dbang du byas pa'i bshad pa yin la/ 'dir man ngag lugs kyi lung sbyor du 'dren pa la de ji lta ba dgos pa'i nges pa med pa'i phyir dang / phyag rgya bzhi pa'i lung gis pho brang drug pa kho na ston rgyu yin na/ bstan bcos der pho brang lnga'i lha brgya lnga bcu rtsa bdun bstan pa'i rjes su/ kun gyi dbang bskur gnas su ni/ /rdo rje sems dpa' zla ba'i mdog /ces gsungs pas lha de thams cad kyi dbang bskur ba'i gnas spyi bor rdo rje sems dpa' re re 'god par bshad la/ de ltar min na kun gyi zhes pa'i mang tshig gi 'bru ji ltar gnon soms shig des na sras don mar lha thams cad la rdo rje rtse lnga pas rgyas 'debs par gsungs pa'ang 'di dang shin tu gnad mthun pa yin no zhes gsungs la/ mkhas pa'i dbang po dkon mchog lhun grub kyi tshangs pa'i rigs sngags su dngos bstan rtsod phreng so so'i lan dang / zhe 'dod kyi dngos lan ma 'khrul ba gnyis su mdzad nas/ dang po la rgol bas kha sbyor gyi lung don phyogs gcig tu zhen pas blo gros chung ba/ phyag rgya bzhi pa'i lung ma mthong ba'i 'ol tshod byas pa/ 'gal spong ma shes pas phyogs snga'i 'dod pa bsgrub pa ste don tshan gsum du mdzad nas/ dang po la kha sbyor gyi rgyud 'chad pa'i tshe rdzogs rim gyi ye shes ston byed du 'chad kyang / man ngag gi tshe lus dkyil ston pa mi 'gal ste/ rtsa rgyud kyi/ e yi rnam pa lha mo spyan/ /zhes sogs dang / kha sbyor las/ e ne sa ru shes par bya/ /zhes sogs rgyud 'chad pa'i tshe