[A:8b] /sta gon gcig las med pa dang / /lus dkyil bskyed gzhi med pa dang / /slob dpon gcig tu nges pa dang / /dbang chog lung khungs med pa dang / /rigs gtso'i rgyas 'debs med pa dang / /dpa' bo'i ston mo med pa rnams/ /rdo rje theg pa spyi dang ni/ /khyad par dpal ldan sa skya pa'i/ /bstan la gnad bcos bdud kyi tshig /yin phyir thos kyang rna ba dgab/ /ces rtsa tshig gi tshul gyis mus srad pa chen po'i brgal ba brgyad kyi lan phyogs gcig tu bkod de 'grel pa'i tshul du lan dang po la/ de ltar na rje btsun bsod nams rtse mo'i dbang chu'i steng nas kye rdor gyi dbang byed pa mi 'thad cing brgyud pa med par 'gyur te/ 'phags pa rin po che'i zhal slob dam pa kun dga' grags/ dga' ldan pa kun bsod/ zhang dkon mchog dpal ba sogs kyis yi ge de'i steng nas ma thob cing / phyag len yang de la mi byed par 'phags pa'i mngon dkyil gyi steng nas mdzad pas so/ /yi ge de gnyis la nang sel gyi khyad par cung zad tsam las med pas rung zer na/ sems bskyed kyi yi ge sgo rum nas ngor chen gyi gsar du rnyed pa de'i steng nas sems bskyed byed pa dang / dbu ma lugs kyi sems bskyed kyi cho ga gnyis la'ang nang sel gyi khyad par phra mo tsam las med pas 'di la'ang mtshungs/ yi ge 'di'i lung mkhan chen shes rdor bas ma thob pa sogs thal ror snang ste/ ngor pa'ang 'di'i lung mi byed pa'i phyir/ des na spyir birWa pa dang / khyad par rje btsun chen po nas brgyud pa'i sems bskyed thob la ma nyams pa dag gis 'di'i steng nas gzhan la sems bskyed phog pa la skyon ci