[A:96a]kyis dbang bskur ba la sogs pa'i dus su 'di ltar byas na legs so zhes gsungs pa yin no/ /yang ngor lugs bzhed pa'i tshogs 'khor gyi rnam gzhag la/ rdo rje gdan pa chen po kun dga' rnam rgyal dpal bzang po zhes rdzong lugs pa dag gi bstan 'dzin rnams kyi gtsug rgyan lta bur gyur pa de nyid kyis gzhan lugs kyi tshogs 'khor gyi rnam gzhag dgag pa dang / rang lugs kyi de'i rnam gzhag legs par bshad pa'i bstan bcos grub pa'i dga' ston zhes bya ba mdzad de/ /de nyid las tshogs 'khor bsten dgos pa/ ma bsten pa'i nyes dmigs/ bsten tshul dngos dang gsum du mdzad nas/ phyi ma'i skabs su de la log rtog dgag pa sogs don tshan gsum du bshad pa'i dang po la mdor bstan rgyas bshad gnyis su mdzad pa'i dang po la/ deng sang gi dus 'dir rdo rje slob dpon rdzas la brkam pa dang longs spyod la chags pa 'gas zhes pa nas/ phyogs de la rims nad bzhin du 'dzem par bya'o zhes pa'i bar gsungs nas ngor lugs la thog mar mdor bstan gyi tshul du dgag pa brjod pa mdzad do/ /de la lan 'debs dngos su mdzad pa po gzhan byung ba ni ma mthong la/ mkhas pa'i dbang po byams pa rab brtan gyi thugs sras rje bsod nams rab brtan zhes bya bas tshogs kyi 'khor lo'i dgag lan log rtog gi brag ri 'joms pa'i rdo rje zhes bya ba mdzad la/ de nyid las rdo rje gdan pa chen pos dgag pa'i gsung dang mtshungs pa'i lan yang mdor bstan dang rgyas bshad gnyis kyi sgo nas 'don par mdzad do/ /de'ang dgag pa mdor